Kókshetaýda birqatar azyq-túlik tómendetilgen baǵamen satylyp jatyr
Vedomstvonyń málimetinshe, áleýmettik mańyzy zor azyq-túlik ónimderiniń negizsiz ósýine jol bermes úshin oblystyq turaqtandyrý qorynan «Qamqor» kommýnaldyq pavılonyna birqatar azyq-túlik túri jetkizilýde.
«Bul - kúnbaǵys maıy, kúrish jáne qaraqumyq. Qazirgi kezde qaraqumyqtyń 1 kelisiniń baǵasy - 267 teńge, kúrishtiń 1 kelisi - 280 teńge, kúnbaǵys maıynyń 1 lıtri - 380 teńge. Aldaǵy ýaqytta ónim túrlerin arttyrý josparda bar», - deıdi vedomstvodan.
Osy rette, oblys turǵyndaryn nan baǵasy, onyń ishinde áleýmettik nan baǵasy tolǵandyrady. Nan jáne un ónimderi baǵasynyń ósýine jol bermes úshin quzyretti memlekettik organdar jergilikti taýaróndirýshiler, kásiporyn basshylary jáne kommertsııalyq uıymdarmen kezdesý ótkizip turady.
«Búgingi kúni 1-sortty unnan pisirilgen áleýmettik nannyń ortasha baǵasy - 70-80 teńge. Máselen, «Aqsaı-Nan» JShS bir bólke nandy 70 teńgeden oblys ortalyǵyndaǵy «Ortalyq bazar», «Jibek Joly» bazarlary, mobıldi dúńgirshekter, «Qamqor» kommýnaldy pavılony, Krasnoıar kentindegi dúkender sııaqty birqatar saýda oryndaryna satýda», - dep tolyqtyrdy Aqmola oblystyq kásipkerlik jáne ónerkásip basqarmasyndaǵylar.
Sonymen qatar, «Kókshetaý nan zaýyty» bir bólke nandy 80 teńgeden satýda.
Aıta keteıik, Kókshetaý qalasynyń birqatar saýda oryndarynda qarashanyń 16-nan bastap nannyń ár bólkesi 75 teńgeden satylyp jatyr. Nannyń baǵasyn ósirmeý maqsatynda «Gormolzavod» JShS men «Aqsaı-Nan» JShS arasynda kelisim jasaldy. Osy kelisimge sáıkes «Aqsaı-Nan» JShS pisirgen salmaǵy 550 gramm nan «Gormolzavod» JShS saýda núktelerinde 70 teńgeden satylady.
Eske sala ketý kerek, Memleket basshysy Qasym-Jomart Toqaev Aqmola oblysyna jumys sapary kezinde Kókshetaýda nan baǵasynyń joǵary ekenin synǵa alǵan bolatyn. Munda un baǵasy shamamen 47 paıyzǵa artqan. Osy rette, Prezıdent azyq-túlik baǵasynyń ósýi halyqtyń tabysyn arttyrý sharalaryn joqqa shyǵaratynyn eskertken edi.
