Kókshetaýda bastaýysh synyp oqýshysynyń mektep formasy qansha turady
Oqý jyly jaqyndaǵan saıyn ata-ana balasyn mektepke daıyndaı bastady. ıAǵnı, kıim-keshek, aıaq kıim, sómke, mektepke qajetti qural-jabdyqtar sııaqty kerek-jaraǵyn satyp alady. Balasy qatardan qalmasyn degen ata-ana múmkindiginshe táýir kıim áperýge tyrysady.
Kókshetaý qalasynda bastaýysh synyp oqýshylaryna arnalǵan mektep formalarynyń baǵasy bazarda 33 000 teńgeden bastalady. ıAǵnı, qyzdardyń ıýbkasy 9 000 teńge, jıleti 6 000 teńge, kóılegi 9 000 teńgeden satylyp jatyr. Al kolgotkıdi 1 000-1 200, aıaqkıimdi 8 000 teńgeden satyp alýǵa bolady.
Bul baǵa qyzdardyń pıdjagi men shalbaryn jáne sporttyq kıimderin eseptemegende, osyndaı bolyp tur.
Bir balaǵa bir komplekt sporttyq kıimniń baǵasy 25 000 teńgeden joǵary (sporttyq kostıým shalbar 13 000 teńgeden, krassovka 10 000 teńgeden, fýtbolka 2 000 teńgeden).
Bastaýysh synyptarda oqıtyn uldardyń mektep formasyn alatyn bolsaq, shalbar – 9 000 teńge, kóılek – 8 000 teńge, aıaqkıim – 8 000, galýstýk – 1 300, bantık – 300, pıdjak 14 000 teńgeden bastalady.
Árıne, joǵary synyp oqýshylaryna bul taýarlardy satyp alý qymbatqa túsedi.
Budan bólek, dápter baǵasy – 35 teńge, qalamsap – 150 teńge, sómkeler 13 000 teńgeden bastalady.
Kókshetaý qalasynyń turǵyny Gúlshat Ybraevanyń qyzy bastaýysh synypta oqıdy. Onyń sózinshe, bir balany mektepke daıarlaý úshin jumsalatyn aqshanyń sommasy 100 myńnan kem bolmaıdy.
«Meniń qyzym baratyn mektepte oqýshylardyń formasy er balalar úshin qara kók nemese qara kastıým shalbar, aq kóılek. Al qyzdar úshin bir tústi qara kók kastıým ıýbka jáne aq kóılek. Qazir kez kelgen ata-ana balasyn shamasy kelgenshe táýir kıindirgisi keledi. Eshkim balasyn jurttan qalsyn demeıdi, kersinshe aldy bolsyn dep tileıdi. Men qyzymdy mektepke ázirleý úshin únemdegenniń ózi shamamen 100 myń teńgege jýyq qarjy jumsadym. Onyń ózi kerek-jaraqtyń barlyǵyn alyp úlgergen joqpyn. Erteń sabaq bastalǵan kezde ustazdar anaý qajet, mynaý qajet dep suraı bastaıdy. Sol kezde naqty qansha jumsaǵanyńdy, qansha aqsha ketkenin bilesin», - deıdi Gúlshat Ybraeva.
Aıta ketsek, barlyq kıimniń baǵasy óndirilip otyrǵan elge baılanysty. Árıne, bazarda saýdalasýǵa bolady. Al eń arzan taýarlar Qytaı men Bishkekten ákelinse, Túrkııa jáne Ońtústik Koreıalyq brend kıimderdiń jáne fırmalyq dúkenderdegi bir taýardyń baǵasy 16 000 teńgeden joǵary.
Sonymen qatar Kókshetaý bazarlarynan ózimizdiń otandyq ónimdi de satyp alýǵa bolady. Alaıda ázirge, onyń sapasy syn kótermeıdi. Oǵan qosa assortımenti az jáne keıbir ólshemderin tabý qıyn. Sol sebepti kópshiligi qymbat ta bolsa, Túrkııa jáne Ońtústik Koreıadan ákelingen kıimderdi satyp alýǵa tyrysady.
