Kókshetaýda aýyz sýdyń sapasy qalaı jaqsartylýda

KÓKShETAÝ. QazAqparat – «Kókshetaý sý arnasy» kommýnaldyq kásipornynyń bas dırektory Ermek Ómirǵalıev qala turǵyndaryn sapaly aýyz sýmen qamtamasyz etý boıynsha atqarylyp jatqan sharalarmen bólisti, dep habarlaıdy QazAqparat tilshisi.

E.Ómirǵalıevtiń aıtýynsha, kásiporynda 350 shaqyrymnan astam sý qubyry men 280 shaqyrym káriz júıesi, sý toraby-sorǵy stantsııasy, qýaty táýligine 21 myń tekshe metr sý tazartý nysany, 7 sý qubyry jáne 24 káriz sorǵy stantsııasy, qýaty táýligine 32 myń tekshe metr aǵyndy sýlardy bıologııalyq tazartý stantsııasy bar.

«2021 jyly sý qubyry jelileri boıynsha 67 jarylý, 576 aǵý, káriz jelileri boıynsha 10 jarylý jáne 6156 bitelý joıyldy, 478 sý taratý kolonkalary aýystyryldy jáne jóndeldi, 44 bekitý-retteý armatýrasy ornatyldy. Magıstraldyq jelilerdi tazalaý boıynsha kúndelikti jumystar júrgizilýde», - dedi E.Ómirǵalıev.

Esepti kezeńde Kókshetaý qalasy, Stantsıonnyı jáne Krasnoıar kentteri boıynsha jalpy uzyndyǵy 4098,2 metr sý qubyry jáne 675 metr káriz júıesi aýystyryldy. Osy ýaqyt ishinde ortalyqtandyrylǵan sýmen tutynýshylardyń 96 paıyzy, ortalyqtandyrylǵan sý burýmen 76,1 paıyzy qamtamasyz etildi. Bıýdjet qarajaty esebinen 64,5 mıllıon teńge somasyna qubyr jelilerin tóseý úshin «XCMG» KBB qondyrǵysy, 41,5 mıllıon teńge somasyna «KamAZ» bazasynda arna jýý mashınasy (krot), sondaı-aq 10,3 mıllıon teńge somasyna «Gazel-Nekst» kóligi qarajatty únemdeý esebinen satyp alyndy.

«Eń bastysy – Kókshetaýdaǵy aýyz sýdyń sapasyn jaqsartý. Bastapqyda sý tazartý qondyrǵylaryndaǵy súzgilerdi aýystyrýdy josparlap otyrmyz. Merdigerlik uıymmen jańa sý tazartý nysandarynyń qurylysy júrgizilýde, biraq onyń aıaqtalýyn kútpeý úshin, biz ázirshe jumys istep turǵan sý tazartý nysandaryn tıisti jaǵdaıda ustaýǵa tyrysamyz. Súzgiler men qumdy aýystyrý qajet», - dep túıindedi E.Ómirǵalıev.