Kókshetaýda áýe kemesiniń ıesine aıyppul salyndy

KÓKShETAÝ. QazAqparat - Kókshetaý kólik prokýratýrasynyń úılestirýimen ýákiletti organ áýe keńistiginde ushý apparattaryn tıisti tirkeýden ótkizbeı paıdalaný tártibiniń buzýshylyqtaryn anyqtady, dep habarlaıdy QazAqparat.

Bas prokýratýranyń málimetinshe, avıatsııa salasyndaǵy qoldanystaǵy zańnamada menshik ıesiniń áýede qozǵalatyn kez kelgen quraldy memlekettik organnyń esebine qoıý mindeti kózdelgen.

«Barlyq qajetti zańdy rásimder oryndalǵannan keıin ǵana avıa apparattar usynylǵan ushý josparyna sáıkes ushýǵa ruqsat beriledi.

Alaıda, ekstremaldy sport áýesqoıy birneshe jyl boıy «Windtech» jáne «BOXER» motoparoplandaryn tirkeýden jasyryp qoldanǵan», - dep jazdy vedomstvodan.

Azamattyq avıatsııa salasyndaǵy ýákiletti organmen júrgizilgen birlesken reıdtik is-sharalardyń nátıjesinde «ushatyn apparattyń» ıesi QR ÁQBtK 569-babynyń 6-bóligi boıynsha aıyppul salynyp ákimshilik jaýaptylyqqa tartyldy (memlekettik tirkeýden ótpegen áýe kemesine ruqsaty bolmaǵany úshin).