Kókshetaýda 72 jastaǵy zeınetkerdiń páterinen eki samosval qoqys shyǵaryldy

KÓKShETAÝ. QazAqparat - Kókshetaýda jalǵyzbasty zeınetkerdiń páterinen eki samosval qoqys shyǵaryldy. Qarııanyń ózi aýrýhanaǵa jatqyzyldy, dep habarlaıdy QazAqparat tilshisi.

Aqmola oblystyq polıtsııa departamenti baspasóz qyzmetiniń málimetinshe, Kókshetaý qalasy polıtsııa basqarmasynyń №4 ýchaskelik polıtsııa pýnktine Temirjol kóshesinde ornalasqan kóp qabatty turǵyn úıdiń turǵyndary júgingen.

«Oblys ortalyǵy turǵyndary qart áıeldiń páterinde antısanıtarııalyq jaǵdaı ornaýyna baılanysty kórshi turatyn zeınetkerge shara qoldanýdy surady»,-dep atap ótti vedomstvodan.

Memleket basshysynyń Joldaýyn iske asyrý úshin Aqmola oblysynda polıtsııa jumysynyń servıstik formatyn qamtamasyz etý bóliginde komıssııanyń osy meken-jaıǵa shyǵýyn júzege asyrý týraly sheshim qabyldandy.

Jumys tobynyń quramyna polıtseılerden basqa, jergilikti atqarýshy organdardyń ókilderi men qalanyń sanıtarlyq-epıdemıologııalyq qyzmetiniń mamandary kirdi.

Tekserý barysynda fakt tolyǵymen rastaldy.

«Oblys ortalyǵynyń 72 jastaǵy turǵyny egde jasyna jáne densaýlyq jaǵdaıyna baılanysty páterdi tıisti deńgeıde ustaı almaǵany anyqtaldy. Turǵyn úıde jándikter men kemirgishterdiń paıda bolýyna, sondaı-aq jaǵymsyz ıistiń shyǵýyna yqpal etetin kóptegen turmystyq qaldyqtar tabyldy», - dep tolyqtyrdy vedomstvodan.

Qazaqstan Respýblıkasy Táýelsizdiginiń 30 jyldyǵyna arnalǵan «30 ıgi is» aktsııasy aıasynda Kókshetaý qalasy polıtsııa basqarmasynyń qyzmetkerleri jergilikti atqarýshy organdarmen birlesip barlyq jınalǵan turmystyq qaldyqtardy jınap, keıinnen sanıtarlyq baqylaý qyzmeti úı-jaıdy dezınfektsııalady.

Bólmeni tazartý úshin samosval qoldanyldy. Nátıjesinde eki mashına qoqys jınaldy.

Qazirgi ýaqytta páter turǵyny aýrýhanaǵa jatqyzylyp, em alýda.