Kókshetaýda 45 pəterli turǵyn úı paıdalanýǵa berildi
Baqyttyń bastamasy, jaqsylyqtyń jarshysy Təýelsizdik merekesi jańa páterlerge qonystanǵan aqmolalyq turǵyndar úshin erekshe este qalatyn boldy. Sharaǵa qatysqan aımaq basshysy Málik Myrzalın qýanysh ıelerin quttyqtap, jańa páterdiń kiltterin saltanatty jaǵdaıda tabys etti.
«Memleket basshysy Nursultan Nazarbaevtyń «Nurly jol-bolashaqqa bastar jol» atty Joldaýynda halyqty baspanamen qamtamasyz etý máselesi naqty aıtylyp, tapsyrma berilgen bolatyn. Osy baǵytta qolǵa alynǵan memlekettik baǵdarlamalar oblys aýmaǵynda baıyptylyqpen júzege asyrylyp, kóptegen turǵyndar páterli bolyp, qýanyshqa kenelýde. Búgingi berilip otyrǵan jańa baspanalar sonyń aıqyn kórinisi. Bul jumystardy odan ári jalǵastyra beretin bolamyz»,- dedi óz sózinde oblys ákimi.
Bul joly 45 pəterli turǵyn úıden baspanaly bolǵandardyń kóbi Turǵyn úı qurylys jınaq bankiniń salymshylary. «Nurly jer» baǵdarlamasy sheńberinde salynǵan toǵyz qabatty turǵyn úıdiń qurylysyna 219,3 mıllıon teńge qarjy jumsalǵan. Oǵan «Báıterek» Development» aktsıonerlik qoǵamy ınvestıtsııa salyp, qurylys jumystaryn «Stroı Teh ІS» seriktestigi júrgizgen. Bir podezdi turǵyn úı bir bólmeli on segiz páter, eki bólmeli on páter jáne úsh bólmeli on jeti páterden turady. Turǵyndardyń júrip turýy úshin lıfti de ornatylǵan. Ǵımarattyń mańyna asfalt tóselgen. Jazǵa qaraı abattandyrý josparda bar. Baspanaly bolǵandardyń arasynda Ákimbaevtar otbasy úsh bólmeli jańa páterin uzaq jyl boıy kútken eken. Otaǵasy Amangeldi qıyndyqtardy artqa tastap, jaqsylyqqa qadam bastyq dep otyr.
«Meniń búgingi qýanyshymdy sózben aıtyp jetkizý múmkin emes. 2001 jyldan beri Turǵyn úı qurylys jınaq bankiniń salymshysymyn. Otbasymda 4 adam bar. Osyǵan deıin páter jaldap keldim. Endi eshteńege alańdamaı, úsh bólmeli jańa páterimde otbasymmen baqytty ǵumyr keshemiz degen oıdamyz. Táýelsizdik merekesi qarsańynda baspanaly bolýdyń máni óte zor. Elbasynyń bastamasymen qolǵa alynǵan «Qoljetimdi baspana - 2020» jáne «2020 jylǵa deıin óńirlerdi damytý» jáne «Nurly jer» memlekettik baǵdarlamalardyń men sııaqty qarapaıym halyqqa bereri mol ekenine kózim jetti», - dedi jańa páter ıesi Amangeldi Ákimbaev.
Osy oraıda, bir aıta keterligi bıylǵy jyly Táýelsizdik merekesi qarsańynda Aqmola oblysy boıynsha barlyǵy 300 páter paıdalanýǵa berilgen eken. Dál qazirdiń ózinde Kókshetaý qalasynda kóppáterli birneshe turǵyn úıdiń qurylysy júrgizilýde.
