Kókshetaý, Semeı, Óskemen JEO-lary qashan paıdalanýǵa beriledi
ASTANA. KAZINFORM – Búgin Úkimet otyrysynda «Samuryq-Energo» AQ basqarma tóraǵasy Qaırat Maqsutov Kókshetaý, Semeı, Óskemen jylý elektr ortalyqtary boıynsha EPC kelisimsharty qashan rásimdeletindigin aıtty.
«Búgingi tańda Qazaqstan men Reseı mınıstrlikteri arasynda Kókshetaý qalasynda qýattylyǵy 240 MVt, Semeı qalasynda qýattylyǵy 360 MVt jáne Óskemen qalasynda qýattylyǵy 360 MVt jylý elektr ortalyǵyn salý jobalary boıynsha yntymaqtastyq týraly memorandýmǵa qol qoıyldy. Jobalardy iske asyrý jónindegi jaýapty kompanııalar bolyp «Samuryq-Energo» men «INTER RAO Eksport» anyqtaldy», - dedi ol.
Onyń aıtýynsha, atalǵan úsh qaladaǵy jylý elektr ortalyǵyn salý barysynda jobalardy júzege asyrý úshin Reseı Federatsııasynyń negizgi tehnologııalyq jabdyqtaryn qoldaný kózdelip otyr. Sonymen birge jobany qarjymen qamtamasyz etý maqsatynda Reseı qarjy ınstıtýttarymen jumys júrgizilip jatyr.
«Qazirgi ýaqytta Kókshetaý qalasyndaǵy stantsııa boıynsha tehnıkalyq-ekonomıkalyq negizdemeni ázirleý aıaqtaldy jáne Semeı stantsııasy boıynsha osy jyldyń naýryz aıynda tehnıkalyq-ekonomıkalyq negizdemeni ázirleýdi aıaqtaý josparlanǵan. Al Óskemen stantsııasy boıynsha tehnıkalyq-ekonomıkalyq negizdemeni ázirleýge kirisip, ony 2024 jyldyń sońyna deıin aıaqtaýdy kózdep otyrmyz. Kókshetaý jáne Semeı stantsııasy boıynsha EPC kelisimshartqa qol qoıý osy jyldyń 3-toqsanyna, Óskemen stantsııasy boıynsha 2025 jyldyń 1-toqsanyna boljanyp otyr. Qurylys 2027-2028 jyldary aıaqtalýy tıis», - dedi Qaırat Maqsutov.
