Kókshetaý qashan «arıstondar qalasy» degen ataýdan qutylady
Aqmola oblysynyń ákimi Marat Ahmetjanov Ortalyq kommýnıkatsııalar qyzmetinde ótken brıfıngide Kókshetaýda salynatyn jylý-elektr ortalyǵynyń ekologııalyq qaýipsizdigi qalaı qamtamasyz etiletinin aıtty, dep habarlaıdy Kazinform.
«Kókshetaý qalasynda jylý-elektr ortalyǵy men jańa káriz júıesi qashan salynady?», - dep surady BAQ ókili ortalyq kommýnıkatsııalar qyzmetinde ótken brıfıngide.
Marat Ahmetjanov jylý-elektr ortalyǵyn salý jóninde memorandýmǵa qol qoıylǵanyn eske saldy.
«Bul ózi kópten kútken joba. Óıtkeni, ókinishke qaraı, Kókshetaý qalasy óziniń jylý-elektr ortalyǵy joq oblys ortalyqtarynyń bolyp otyr. Basqasha aıtsaq, halyq arasynda Kókshetaýdy «arıstondar qalasy» dep ataıdy – ár úıde sý jylytatyn qondyrǵy ornatylǵan. Men aıtyp turǵan memorandýmnyń oryndalýyna Energetıka mınıstrligi jaýapty. Biraq biz de basy-qasyndamyz. Jýyqta ǵana Energetıka mınıstri osy nysandy salatyn merdigermen baryp kezdesti. Qazir saraptama júrip jatyr, aıaqtalý satysynda. Osydan keıin birden qurylys bastalady. Onyń ústine jylý-elektr ortalyǵy qosymsha jumys ornyn beredi», - dedi aımaq basshysy.
Onyń aıtýynsha, jylý-elektr ortalyǵy halyqtyń elektr shyǵyndaryna jumsaıtyn shyǵyndaryn azaıtý kerek.
«Búginde bizde jazdyń ózinde elektr qýatyn tutyný kólemi óte joǵary ekenin bilesiz. Osy baǵytta da esep júrgizdik. Jylý-elektr ortalyǵy salynǵanda turǵyndardyń arıstonnyń elektrine tóleıtin qarajaty únemdeledi. Odan bólek, búginde jylý-elektr ortalyǵy qalany ári qaraı damytýǵa múmkindik beredi. Qazir bizde eki jylý qazandyǵy bar. Olardyń qýaty tutas qalany jylýmen qamtamasyz etýge jetpeıdi. ıAǵnı, qalany keńeıtýge, iri qurylys salýǵa qýat tapshylyǵy múmkindik bermeı keldi. Salynatyn jylý-elektr ortalyǵynyń qýaty saǵaty 500 Gıgakalorııa bolady. Ol nysan osy tapshylyqtyń bárin jabady. Qalada avtonomdy jylytý nysandary da osy ortalyqqa jalǵanady. Onyń ekologııalyq qaýipsizdik máselesine alańdaıtyndar bolýy múmkin. Ol jaǵynan búkil halyqaralyq talapqa saı bolady. Óıtkeni onyń qorshaǵan ortaǵa tastaıtyn shyǵaryndysy qazirgi eki jylý qazandyǵy tastaıtyn kólemnen eki ese az bolady», - dedi ákim.
