Kókshetaý aıaldamalaryna QR-kodtary bar stendtter ornatyla bastady

KÓKShETAÝ. QazAqparat -  Kókshetaý aıaldamalaryna QR-kodtary bar stendter ornatyla bastady. Endi qala turǵyndary avtobýs kútip turyp, mádenı nysandar, sonyń ishinde kitaphanaǵa kelip túsken jańa kitaptar jóninde aqparat ala alady, dep habarlaıdy QazAqparat tilshisi.

Búgin Aqmola oblysynyń ákimi Málik Myrzalın aımaq ortalyǵyndaǵy birqatar óndiristik, mádenı-áleýmettik nysandardy aralap, qazirgi jaǵdaıymen jáne atqarylyp jatqan jumystardyń barysymen tanysty.

Oblys basshysy aldymen óner jəne ádebıet murajaıynda boldy. 1903 jyly irgesi qalanǵan ǵımarat osy kúni kúrdeli jóndeý jumystaryn qajet etedi. Murajaı qorynda 9 myńnan astam jədiger saqtaýly. Sońǵy kezderi qor taǵy 400 jədigermen tolyqty. Murajaı sórelerinen Qanaı bı, Aqan seri, Birjan sal, Səken Júnisov sııaqty tanymal tarıhı tulǵalardyń kıim-keshekteri men mýzykalyq aspaptaryn, qoljazbalary men kúndelikti ómirde qoldanǵan turmystyq zattaryn kórýge bolady. Sondaı-aq murajaı janynda shyǵarmashyl jastardyń «Jas tulpar» klýby jumys isteıdi. Murajaı jumysymen tanysqan oblys ákimi qala jáne oblystyq mádenıet basqarmasynyń basshylyǵyna ǵımaratty jóndeý jumystaryn oılastyrýdy tapsyrdy.

Budan keıin oblys basshysy Aýǵan soǵysy ardagerleriniń alleıasyna at basyn tiredi. Eskertkish 2003 jyldyń 12 jeltoqsanynda ornatylǵan. Eskertkish avtory - aýǵan soǵysynyń ardageri V.Kolodochkın. Eskertkish taqtaǵa 1979-1989 jyldary Aýǵanstanda qaza bolǵan 89 jaýyngerdiń aty-jónderi qazaq jáne orys tilderinde qashap jazylǵan. Oblys basshysy qalanyń kórikti jerine ornalasqan ardagerler eskertkishi aýmaǵyn abattandyrý jaıyna nazar aýdardy.

Qazirgi kúni oblys ortalyǵyndaǵy 16 avtobýs aıaldamasyna QR-kodtary bar qabyrǵa-taqtalar ornatylǵan. QR-kodtardy smartfondarǵa skanerleý arqyly qaladaǵy mekemelerge qatysty málimetterdi alýǵa bolady. Atap aıqanda, kitaphanalardyń baılanys telefondary, kitap qory, qalalyq «Dostar» mádenıet úıindegi klýbtyq qurylymdar, shyǵarmashylyq úıirmeler, memlekettik, aǵylshyn tilderin úıretetin tegin kýrstar týraly málimetter qoljetimdi. Turǵyndar tarapynan atalmysh joba qoldaýyn taýyp, suranysqa ıe bolyp jatsa, QR-kodtar qoǵamdyq oryndarǵa da ornatylatyn bolady.

Qala turǵyndary men mekemelerdi jylýmen qamtamasyz etip otyrǵan №2 aýdanaralyq jylý qazandyǵynda bolǵan óńir basshysy kómir qory, jumys isteý rejımi týraly surastyryp, qystyń eń aýyr ýaqyty artta qalsa da, sýyq kúnder áli de bolatyndyǵyn atap ótti.

Sonymen qatar, aımaq basshysy as sýy jáne alkogoldi ishimdikter shyǵarýmen aınalysatyn «Natýr-Prodýkt» JShS,  kondıterlik buıymdar shyǵaratyn «TaýKon» JShS jəne jıhaz qurastyratyn «Dva Kıta» JShS jumystarymen tanysty.

Foto: kommersant.uz