«Kóksaraı» sý rettegishine kóp sý jınaý qaýipti
TÚRKІSTAN.KAZINFORM - Tótenshe jaǵdaılar mınıstri Shyńǵys Árinov Túrkistan oblysyna jumys saparymen keldi.
Mınıstr Túrkistan oblysynyń ákimi Darhan Satybaldymen birge óńirdegi «Kóksaraı» sý rettegishin aralap, qarap shyqty. Sonymen birge tikushaq arqyly áýeden baqylap, sholý jasady.
«Kóksaraı» sý rettegishi paıdalanýǵa 2011 jyly berilgen. Negizgi maqsaty – sý tasqynynyń aldyn alý. Munda qulaqtandyrý qondyrǵysy ornatylmaǵan. Qazirgi jaǵdaıy qanaǵattanarlyqsyz. Bógetke kópfaktorly zertteý jumystaryn júrgizip, qorytyndysyn alǵansha kóp kólemdi sý jınaý óte qaýipti. Qazirgi tańda respýblıkalyq bıýdjetten jobalyq-smetalyq qujaty men kúrdeli jóndeý jumystaryna qarjy bólingen.
Shyńǵys Árinov kópfaktorly zertteý jumystaryn júrgizý qajettigin, sonymen qatar dabyl qaǵý qondyrǵysyn ornatyp, sý qoımada sý tasqyny kezeńinde qaýipsizdik sharasyn saqtaý qajettigin aıtty.
«Kóktemgi sý tasqynyna daıyndyq sapaly bolýy tıis. Bizdiń mindetimiz – adamdardy qorǵaý, tótenshe jaǵdaıdyń aldyn alý. Turǵyndarǵa túsindirý jumystaryn júrgizip, jaǵdaıdyń ózgerýi týraly jedel habardar etý qajet. Eldi mekenderde sý aǵatyn aryqtardy tazalaý boıynsha ýaqytyly sharalar qabyldaý kerek», - dedi QR Tótenshe jaǵdaılar mınıstri.
Oblysta sý tasqyny qaýpi bar 1 eldi meken aıqyndalǵan, onda 665 úı men 1620 adam bar. Qazirgi tańda TJD mamandary táýlik boıy sý qoımalardy baqylaýda ustap keledi. Jergilikti atqarýshy organdar Sý tasqynyna qarsy is-sharalar josparyna sáıkes jumystardy aldyn ala júrgizip jatyr.
