«Kóksaraı» sý rettegishi turǵan kezde shirkeıden qutyla almaımyz – ǵalym
TÚRKІSTAN. KAZINFORM – Túrkistan oblysynda bıyl shirkeımen kúres erte bastalady. Ótken jyly sáýir aıynda qolǵa alynǵan dezınsektsııa jumystary bıyl naýryzdan bastap júrgiziledi. Bul týraly Túrkistan oblysy energetıka jáne turǵyn úı-kommýnaldyq sharýashylyq basqarmasynyń basshysy Rýslan Muzdybekov málimdedi.
Shirkeıler óńirdegi eń ózekti máselelerdiń biri bolyp otyr. Syrdarııa ózeniniń boıy men Kóksaraı sý rettegish qoımasy mańyndaǵy eldi mekenderde sońǵy jyldary shirkeı kóbeıip ketken. Saldarynan turǵyndar betterin tumshalap júrýge májbúr. Tipti, ótken jyldary shirkeıden qoıan kójekteri men tóldegen sıyrdyń buzaýy jáne jylqylardyń qulyndary ólip ketken jaǵdaılar da kezdesken.
Osyǵan oraı, Túrkistan, Kentaý, Arys qalalary men Otyrar, Shardara, Maqtaaral, Keles aýdandary ákimdikteriniń suranysy boıynsha bıylǵy dezınsektsııa júrgizý aımaqtary belgilendi.
«Jalpy bıylǵy dezınsektsııa sharalaryna 655,9 mln. teńge qarjy qaralyp otyr. Qazirgi tańǵa merdiger «Zaşıta rastenıı-K» JShS-gi tarapynan ǵylymı top qurylyp, shirkeılerdiń kóbeıý oshaqtaryn anyqtaý jumystaryn bastady. Top quramyna Almaty qalasynyń zoologııa ınstıtýtynyń aǵa ǵylymı mamany Qarshyǵa Kóshkımbaev jáne basqada bilikti mamandar tartylǵan. Shirkeılerdiń sanyn azaıtý kezinde bıologııalyq jáne hımııalyq preparattarymen óńdeý jumystary júrgiziletin bolady», - dedi Rýslan Muzdybekov.
Al, «Zaşıta rastenıı-K» JShS ókili, ǵalym Qarshyǵa Kóshkımbaev shirkeımen kúres 20-30 jylǵa sozylýy múmkin ekenin jetkizdi.
«Shirkeıdi 100 paıyz joıyp jiberý múmkin emes. Bir analyǵy neshe júzdegen jumyrtqa salady. Sondaı-aq bir jazda 4-5 ret jumyrtqalaýy múmkin. Bıyl dárileý jumysyn júrgizbesek, kelesi jyly dál buryńǵy qalpyna keledi. Shirkeımen kúres 20-40 jyl sozyla berýde de múmkin. Ol qurymaıtyn nárse. Kóksaraı sý rettegishi turǵan kezde shirkeıden qutylmaısyzdar», - dedi ol.
