Kókpar tartqan balalar jeli qoldanýshylaryn qyzyqtyrdy - sheteldegi qazaq baspasózi
ASTANA. KAZINFORM - Kazinform HAA sheteldegi qazaq tilinde taraıtyn aqparat kózderine aptalyq sholýyn usynady.
Túrkııa mádenıet joly festıvaline 40 myń ónerpaz qatysady - TRT
Mádenıet jáne týrızm mınıstri Mehmet Nýrı Ersoı Stambýlda «Túrkııa mádenıet joly festıvali» baǵdarlamasyn egjeı-tegjeıli tanystyrdy. 8 aıǵa sozylatyn festıval aıasynda 6 myńnan astam is-shara uıymdastyrylady.
Mınıstr álemde teńdesi joq joba dep ataǵan «Mádenıet joly festıvali» bıyl 16 qalada ótedi eken.
Bul týraly Túrkııa Radıo Televızııa portaly habarlady.
Sondaı-aq Ersoı festıvalge qatysatyn ónerpazdyń sany byltyrǵy rekordtyq kórsetkishti jańartatynyn aıtty. Mınıstrdiń málimetinshe, 2023 jyly festıvalge qatysatyn óner adamy sany 34 myńǵa jetse, al bıylǵy qatysýshylar sany 40 myń ónerpaz bolmaq.
Aıta ketý kerek, bıyl Túrkııa mádenı joly festıvalin 13-21 sáýir aralyǵynda Adanada apelsın gúli karnavalymen bastalmaq.
Bul festıvaldiń eń mańyzdy elementteriniń biri 80-nen astam túpnusqa týyndysy bar Pıkassonyń áserli kórmesin basty qonaq retinde kutpek. Jáne 3 aı boıy ártúrli qalalardaǵy óner súıer qaýymǵa tanystyrý arqyly erekshe tájirıbege qol jetkizýdi maqsat etýde.
Sonymen qatar álemge tanymal kóptegen tulǵanyń týyndylary festıvaldiń sánin keltirmek. Bıylǵy jyly is-sharalar 600-den astam nysanda ótedi.
Memlekettik opera jáne balet teatry áıgili Anadoly ańyzy «Shahmeran» da alǵash ret sahnaǵa qoıylady.
Beıjińde Qytaıdaǵy «Qazaqstan týrızm jylynyń» týrızmdi damytý jáne ınvestıtsııalaý forýmy ótti – «Halyq gazeti»
28 naýryz kúni Beıjińde Qytaıdaǵy «Qazaqstan týrızm jylynyń» týrızmdi damytý jáne ınvestıtsııalaý forýmy ótti. Qytaı men Qazaqstan ózara túsinistik týraly birqatar memorandýmǵa qol qoıyp, Qytaıdaǵy «Qazaqstan týrızm jylynyń» shymyldyǵyn ashty. Forýmǵa Qytaıdyń Mádenıet jáne týrızm mınıstri Sýn Elı men Qazaqstannyń Týrızm jáne sport mınıstri Ermek Marjyqpaev qatysty.
Bul týraly osy aptada Qytaıdyń «Halyq gazeti» de habarlady.
Qytaıdyń Mádenıet jáne týrızm mınıstri Sýn Elı týrızmdi damytý jáne ınvestıtsııalaý forýmy 2024 jylǵy Qytaıdaǵy «Qazaqstan týrızm jyly» aıasyndaǵy mańyzdy is-shara ekenin atap ótti.
Qytaılyq mınıstrdiń málimetinshe, ótken jyldyń mamyr aıynda QHR Tóraǵasy Sı Tszınpın men QR Prezıdenti Qasym-Jomart Toqaev arasyndaǵy kelissózder barysynda ol Qytaı-Qazaqstan qarym-qatynasy jańa «altyn 30 jyldyqty» ashqanyn jáne eki tarap dástúrli dostyqty belsendi túrde ilgeriletip, ózara tıimdi yntymaqtastyqty tereńdetýi kerek.
Sonymen qatar, Qytaıdyń Mádenıet jáne týrızm mınıstrligi qazaqstandyq seriktestermen birlesip, eki memleket basshylarynyń konsensýsyn júzege asyrýǵa, Qytaı-Qazaqstan týrıstik yntymaqtastyǵynda úzdiksiz jańa nátıjelerge qol jetkizýge jáne eki el halqyna baqyt jaratýǵa járdemdesýge daıyn ekenin jetkizdi.
Al qazaqstandyq mınıstr Ermek Marjyqpaev Qazaqstan týrısterdi tartý úshin óziniń baı kóshpeli mádenıetin, júzdegen jyldyq tarıhy men qaıtalanbas tabıǵı landshafttaryn paıdalanatynyn aıtty. Sondaı-aq ol Qytaıdaǵy «Qazaqstan týrızm jyly» - bul eki el arasyndaǵy dostyq qarym-qatynasty nyǵaıtýǵa kómektesetin mańyzdy is-shara ekenin aıtqan.
Aıta keteıik, josparǵa sáıkes, 2024 jyly Qytaıdaǵy «Qazaqstan týrızm jyly» aıasynda 35-ten astam is-shara ótkiziledi.
Iranǵa 300 myńnan astam sheteldik stýdentti tartýǵa ruqsat berildi – «Parstoday»
Irannyń Stýdentter isi jónindegi uıymynyń basshysy Hashem Dadashpýr kem degende 300 000 halyqaralyq stýdentti tartý úshin 200-den astam ırandyq ýnıversıtetke ruqsat berilgenin habarlady. Bul týraly Irannyń «Parstoday» aqparat agenttigi jazdy.
Sháhıd Beheshtı ýnıversıtetinde ótken ekinshi Soraıa ulttyq festıvalinde atalǵan habardy Hashem Dadashpýr jetkizdi.
Onyń aıtýynsha, Iran ýnıversıtetterindegi joǵary ǵylymı dárejeler men ǵalymdardyń arqasynda eldiń 200-den astam ýnıversıteti Stýdenttik ister uıymynan halyqaralyq stýdentterdi tartýǵa ruqsat alǵan. Sondaı-aq aldaǵy bes jylda 320 000 halyqaralyq stýdentti oqýǵa alamyz dep úmittenedi.
Iran Stýdentter isteri uıymynyń basshysy elder arasyndaǵy mádenı aıyrmashylyqtardy qabyldaýymyz kerek dep toqtalǵan. Atap aıtqanda, kez kelgen elden Iranǵa kirgen stýdent óz eliniń koordınattarymen Iranda paıda bolady jáne Iran ýnıversıtetterinde olardyń qatysýy úshin qajetti daıyndyq bar.
Aıta keteıik, qazirgi ýaqytta Irannyń 32 oblysynda 2183 joǵary bilim berý ortalyǵy bar.
Sondaı-aq osy aptada «Parstoday»-de «Irannyń ekonomıkalyq ósimi artty» degen taqyryptaǵy aqparat jarııalandy.
Halyqaralyq valıýta qory óziniń statıstıkalyq aqparatynda Irannyń sońǵy jyldardaǵy ekonomıkalyq ósiminiń artqanyn jarııalady.
Irandyq BAQ-tyń habarlaýynsha, Halyqaralyq valıýta qory jarııalaǵan statıstıkalyq málimetterge sáıkes, Irannyń 2013-2021-shi jyldyń sońyna deıin (11-shi jáne 12-shi úkimetter) ortasha jyldyq ekonomıkalyq ósimi 1,5 paıyzdy quraǵan.
«Halyqaralyq valıýta qorynyń 1981 jyldan beri Irannyń ekonomıkalyq ósimi týraly jarııalaǵan statıstıkasyna sáıkes, eń tómengi ekonomıkalyq ósim qasıetti qorǵanys dáýirinde 0,9% boldy, bul eldiń soǵys jaǵdaılaryn eskergende qalypty jaǵdaı. Biraq soǵystan keıin Irannyń segiz jyldaǵy eń tómengi ekonomıkalyq ósimi 2013 jyldan 2021 jyldyń sońyna deıin boldy», dep jazady «Parstoday» aqparat agenttigi.
Almatydaǵy «Kók tóbe» saıabaǵynda Ózbekstannyń týrıstik áleýeti kórsetildi - «ÓzA»
Ózbekstandyq BAQ-tyń habarlaýynsha, Almaty qalasynyń kórikti jerleriniń biri «Kók tóbe» saıabaǵynda Ózbekstannyń týrıstik áleýeti tanystyryldy.
Atalǵan is-sharany Ózbekstannyń Bas konsýldyǵy «Uzbekistan Airways» kompanııasymen birlesip Qazaqstannyń jetekshi týroperatorlary men Almaty qonaqtary men qala turǵyndary úshin uıymdastyrǵan.
Іs-sharada Ózbekstandaǵy týrızm salasyndaǵy jetistikter, týrıstik baǵyttar men tarıhı eskertkishterdi saqtaý, zamanaýı qonaq úı ınfraqurylymyn damytý týraly aqparattyq materıaldar usynylǵan. Qonaqtar Shyǵystyń ulttyq mádenıetimen tanysýǵa múmkindik alyp, ózbek ulttyq taǵamdary – dástúrli palaý jáne shyǵystyq táttilerinen dám tatty.
Sondaı-aq osy aptada «ÓzA»-da «Ózbekstan 52 elge toqyma ónimderin eksporttady» degen taqyryptaǵy aqparat jarııalandy.
Statıstıka agenttiginiń málimetinshe, Ózbekstan 2024 jyldyń qańtar-aqpan aılarynda 519,4 mıllıon dollarǵa toqyma ónimderin eksporttaǵan.
Bul kórsetkish jalpy eksporttyń 14,3 paıyzyn qurap, ótken jyldyń osy kezeńimen salystyrǵanda 3 paıyzǵa ósken.
«Eksporttalǵan toqyma ónimderiniń ishinde negizgi úlesti daıyn toqyma buıymdary (37,4 paıyz) jáne jip (47,7 paıyz) aldy. 2024 jyldyń qańtar-aqpan aılarynda álemniń 52 eline toqyma ónimderiniń 496 túri eksporttaldy», - dep jazdy ózbekstandyq BAQ.
Kókpar tartqan balalar jeli qoldanýshylaryn qyzyqtyrdy - «Harajorga»
Kókpar tartý - Shyńjańdaǵy az sandy ulttardyń dástúrli at sporty oıyndarynyń biri. Atalǵan oıyn kóbinese mereke-meıramdarda nemese toılarda ótkiziledi. Kókpar - erlikti synaıtyn báseke túri. Shyńjańdaǵy mal sharýashylyǵyn kásip etken óńirlerdegi balalarda kókpar oıynyn oınaıdy, - dep habarlaıdy Qytaıdyń «Harajorga» áleýmettik jelisi.
Atalǵan aqparat kóziniń dereginshe, 25 naýryz kúni Hotanda bir top bala kókpar tartyp oınaǵan vıdeosyn jarııalaǵan. Olardyń atpen shapqylap, asyr-salyp oınaǵandary áleýmettik jeli qoldanýshylaryn qyzyqtyrǵan.
«Kúres kúshti synaıdy, kókpar erlikti synaıdy. Baqtashylardyń balalary 3-4 jasynan bastap kókpar tartýǵa mashyqtanady. Myna balanyń qamshyny tistegen beınesi qandaı ádemi. Kókpar jarysy shapshańdyqty, qyraǵylyqty, at ústindegi tepe-teńdikti saqtaýdy talap etetin, qateri de bar ulttyq at oıyndarynyń bir túri sanalady», - dep jazdy qytaılyq BAQ.
Bul aqparatta atqa minip kókpar oınap júrgen jetkinshekterdiń birneshe vıdeosy jarııalanǵan. Solardyń birinde kókparshylardyń kıimin kıgen 4-5 jastaǵy qazaq balasy, úlken bolǵanda taıǵa minip, kókpar tartyp, chempıon bolǵysy keletinin aıtady.
