Kókpar: Astana quramasy el chempıonatynda úzdik úshtikke endi
ASTANA.KAZINFORM — «Arǵymaq» at sporttyq-saýyqtyrý kesheninde kókpardan eresekter arasyndaǵy Qazaqstan chempıonatynyń qola júldegerlerin – Astana qalasynyń sportshylaryn ulyqtaý rásimi ótti. Bul týraly elorda ákimdiginiń saıty jazdy.
4-11 qazan aralyǵynda Shymkent qalasynda ótken kókpardan eresekter arasyndaǵy Qazaqstan Respýblıkasynyń XXIV chempıonatynda astanalyq komanda 13 jyl úzilisten keıin qaıtadan júldegerler qataryna qosyldy.
Bıylǵy básekede 15 komanda baq synady. Elorda ókilderine doda ońaı soqqan joq. Toptyq kezeńde olar Qostanaı oblysyn jáne byltyrǵy qola júldeger ári favorıt sanalatyn Túrkistan oblysyn 3:2 esebimen tize búktirdi. Al jartylaı fınalda el chempıony — Jambyl oblysynan 0:4 esebimen utylsa, úshinshi oryn úshin ótken kezdesýde Qyzylorda oblysyn 3:2 esebimen jeńip, qola júldeni ıelendi.
Aıta ketsek, 2012 jyly Óskemende ótken Qazaqstan chempıonatynda dál osy quram fınalda Jambyl oblysyn 8:1 esebimen jeńip, chempıon atanǵan edi. Sol kezdesýde komanda sapynan Arslan Qabjanov alty salym salsa, Aleksandr Pýpenko men Baýyrjan Aıtmaǵambetov bir-bir salymnan engizgen bolatyn.
— 16 jasymnan beri kókparmen kásibı túrde aınalysyp kelemin. Osy 22 jyl ishinde Qazaqstan jáne álem chempıony atanyp úlgerdim. Kókparda nátıjege jetý úshin shabandoz ben attyń daıyndyǵy asa mańyzdy. Biz bul chempıonatta ámbebap Qostanaı jylqysymen synǵa tústik. Tynymsyz eńbek pen tájirıbeniń arqasynda qola júldege ıe boldyq. Árıne, bul ońaı bolǵan joq. Kókpar — tize, bel, arqa jaraqaty jıi kezdesetin sport túri. Kásibı sportshylardyń bárinde ózindik jaraqat bar, — dedi Astana komandasynyń úzdik shabýylshylarynyń biri Aleksandr Pýpenko.
Elorda komandasynyń jetistigine úles qosqan mańyzdy faktorlardyń biri — «Saıan» atty sáıgúlik. Bul at chempıonattyń «Úzdik jekpe-jek aty» ataǵyna ıe boldy. Sondaı-aq, jasy 50-ge taıaǵan tájirıbeli kókparshy Qazbek Amangeldınovtiń de eńbegi zor.
– Jigitterdiń daıyndyǵy men kúsh-jigeriniń arqasynda júldege qol jetkizdik. Komanda quramynda kókparmen kóp jyldan beri aınalysyp júrgen oıynshylar bar. Bıyl qatarymyzǵa tórt jas shabandozdy qostyq. Jetistikke jetýimizge yqpal etken faktorlardyń biri — Soltústik Qazaqstan óńirinde uıymdastyrylǵan arnaıy lıga. Ótken jyly dál osy jarystyń arqasynda Astana quramasy jasaqtalǵan bolatyn. Endi toqmeıilsimeı, daıyndyqty jalǵastyryp, budan da joǵary nátıjege jetýdi maqsat etemiz, — dedi Astana komandasynyń bas jattyqtyrýshysy Erlan Qanapın.
Aıta keteıik, Qazaqstan chempıonatynda qola júldege ıe bolǵany úshin Astana quramasyna 2 250 000 teńge kóleminde syıaqy tabystaldy.
Al Qyrǵyzstanda ótetin dúnıejúzilik kóshpendiler oıyndarynda qazaq kókpary bola ma, álde bolmaı ma? Ony myna siltemeden oqyńyz.