Qoǵamdyq qaýipsizdikti qamtamasyz etýdiń 2024-2028 jyldarǵa arnalǵan tujyrymdamasy maquldandy

ASTANA. QazAqparat - QR Premer-Mınıstri Álıhan Smaıylovtyń tóraǵalyǵymen Úkimette ótken keńeste Qoǵamdyq qaýipsizdikti azamattyq qoǵammen seriktestikte qamtamasyz etýdiń 2024-2028 jyldarǵa arnalǵan tujyrymdamasynyń jobasy qaraldy.

Bul týraly QazAqparat Úkimettiń resmı saıtyna silteme jasap habarlaıdy.

Іshki ister mınıstri Marat Ahmetjanov tujyrymdama jobasyn tanystyra otyryp, úsh strategııalyq baǵytty atap ótti:

azamattardyń ómirin, densaýlyǵyn, múlkin qorǵaý deńgeıin arttyrý;

quqyqbuzýshylyqtardyń aldyn alýdyń tıimdi júıesin qurý;

polıtsııany qaýipsizdikti qamtamasyz etetin zamanaýı tıimdi uıymǵa aınaldyrý.

Tujyrymdamanyń basty ereksheligi ony ázirleý tásilin ózgertý boldy. Tujyrymdamany ázirleýge áýel bastan jurtshylyq, ÚEU, táýelsiz sarapshylar, halyqaralyq uıymdar, ǵylymı qoǵamdastyq, sondaı-aq múddeli memlekettik organdar belsendi qatysady.

Osylaısha, tujyrymdamada «halyq únine qulaq asatyn memleket» qaǵıdatyna sáıkes keletin qoǵamnyń naqty suranystary eskeriletin bolady.

Otbasylyq-turmystyq zorlyq-zombylyq máseleleri boıynsha ótinishterdiń artýyna baılanysty Tujyrymdama jobasynda mynadaı zańnamalyq ózgerister engizý kózdelgen:

áreket etýdiń ótinish berý formasynan anyqtaıtyn túrine kóshý;

turmystyq zorlyq-zombylyq úshin jaýapkershilikti kúsheıtý.

Ózgerister nashaqorlyqtyń aldyn alýǵa, sonyń ishinde esirtki tutyný faktilerin erte bastan anyqtaý júıesin engizýge, barlyq quqyqbuzýshylyqtyń 90% quraıtyn múlikke qarsy qylmystardyń aldyn alýǵa, ınternet-alaıaqtyqqa qarsy is-qımylǵa jáne basqa da salalarǵa da qatysty bolady.

Barlyq normatıvtik-quqyqtyq aktige revızııa júrgizý, qylmystyń aldyn alý jónindegi zańnamany júıeleý jáne sarapshylarmen, ÚEU-men, ǵalymdarmen áriptestik tetigin qarastyrý usynylady.

Keńeske qatysýshylar jalpy Tujyrymdama jobasyn maquldady.

Foto: primeminister.kz