Qoǵamdyq baqylaý: Qazaqstannyń qaı óńirleri sanıtarlyq talapty saqtamaıdy
Nur-Sultanda qoǵamdyq kólikte jáne «Mega Silk Way» saýda, oıyn-saýyq ortalyǵynda turǵyndar áleýmettik qashyqtyqty saqtamaıdy jáne maska rejımin buzýda. «Qoǵamdyq baqylaý» toby qoǵamdyq kólikterdiń 80-90% tolatynyn anyqtady.
Sodan keıin baqylaýshylar Qaraǵandy qalasyndaǵy ortalyq bazar men vokzalǵa bardy. Toptyń aıtýynsha, bıznes tarapynan birneshe norma saqtalyp jatqan joq: kirý/shyǵý esikteri bólinbegen, antıseptıkterdiń sertıfıkaty joq. Kórer kóz ben ıis arqyly munyń jaı ǵana sý nemese keıbirinde sý aralasqan suıyq sabyn ekenin baıqaýǵa bolady. Bazar aıaldamasy adamǵa tolǵan, áleýmettik qashyqtyq pen maska rejımi de saqtalmaýda.
Pavlodarda maska rejımi jalpy saqtalǵan, biraq saýda, oıyn-saýyq ortalyqtary men qoǵamdyq oryndarda áleýmettik qashyqtyq joq. Saýda-oıyn-saýyq ortalyǵyna kiretin adamdar sany shekteýli bolǵandyqtan, ortalyq aldynda kezek paıda bolǵan. Sondaı-aq jalpy bilim beretin mektepterge monıtorıng júrgizildi. Onda sanıtaızerler ornatylyp, oqýshylar 1 oqýshydan shahmat tártibimen otyrǵyzylǵan. Synypta oqýshylar sany 15-ten aspaýy tıis. Alaıda, ata-analar sabaq aıaqtalǵanda mektep qaqpasyna kóptep jınalady jáne tobyr qurady.
Tarazda Qoǵamdyq baqylaý toby qaýipsizdik normalarynyń óreskel buzylǵanyn anyqtady: «Kaspi» banki aldynda adamdar únemi toptasyp turady, maska rejımi buzylǵan, bazar satýshylary men halyq áleýmettik qashyqtyqty saqtamaıdy. «Tutas monıtorıng barysynda oń ózgerister baıqalmady», - dep atap ótti «Qoǵamdyq baqylaý» toby.
Oral men Aqtóbede de áleýmettik qashyqtyqtyń saqtalmaýy jáne maska rejıminiń buzylýy baıqalǵan.
Qostanaı oblysy boıynsha Qoǵamdyq baqylaý birqatar máseleni anyqtady: aýdandyq jáne qalalyq aýrýhanalarda qyzmetkerler úshin qolǵaptar, bir ret qoldanylatyn maskalar jetispeıdi. Dárigerler kásipkerlerge júginip, solardyń jeke qarajatyna qajetti buıymdardy aldyrǵan. Turǵyn alaptarynda, kóshelerde, shaǵyn saýda oryndarynda jáne kókónis dúkenderinde sanıtarlyq normalar buzylýda. Patrýldik qyzmetterdiń belsendiligi aıtarlyqtaı tómendegen. Úılerdiń birindegi turǵyndar zańsyz qurylys týraly Prezıdent apparatyna shaǵym jibergen, biraq shaǵym oblysqa qaıta jiberildi. Olarmen kezdesýge ókilettilik deńgeıi tómen bir ǵana maman jiberilgen. COVID-19-ǵa taldaý nátıjelerin berý merzimi áli de keshiktirilýde. Dári-dármekti statsıonarlarǵa jetkizýde kedergiler bar, naýqastardyń tegin berilýi tıis dári-dármekti satyp alýy faktileri de kezdesken.
