Qoǵamdyq orynda bet-júzin tanýǵa kedergi keltiretin zattardy qoldanýǵa tyıym salynady
ASTANA. KAZINFORM – Búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine ishki ister organdarynyń qyzmeti salasyndaǵy normalardyń artyq zańnamalyq reglamenttelýin bolǵyzbaý máseleleri boıynsha ózgerister men tolyqtyrýlar engizý týraly» Zańy ekinshi oqylymda qaralyp, qabyldandy.
- Birinshiden, quqyq qorǵaý organdarynyń, arnaýly memlekettik organdardyń qaıtys bolǵan qyzmetkerleriniń, áskerı qyzmetshilerdiń otbasy músheleri 2022 jylǵy qańtardan bastap birjolǵy járdemaqy tólemderine qosymsha retinde aı saıynǵy tólemder alýǵa quqyǵy bar (jesirleri – ómir boıy, balalary – 23 jasqa tolǵanǵa deıin). Alaıda bul sanatqa 2021 jylǵy 31 jeltoqsanǵa deıin qaıtys bolǵan qyzmetkerlerdiń otbasy músheleri enbeı qalǵan. Bul olqylyqty joıý maqsatynda osy normaǵa keri kúsh berý týraly túzetý engizildi. Qazirgi kezde 1991 jylǵy 16 jeltoqsan men 2021 jylǵy 31 jeltoqsan aralyǵyndaǵy kezeńde qaıtys bolǵan qyzmetkerlerdiń 530 otbasy osyndaı aı saıynǵy tólemderdi almaı kelgen. Endi búgin qaralyp otyrǵan zań aıasynda osy otbasylar atalǵan ótemaqyny aı saıyn alady, - dedi depýtat Jarqynbek Amantaıuly.
Ekinshiden, atalǵan zań aıasynda Qazaqstanda tehnıkalyq sora (kanabıs) salasynda óndiristi damytýǵa otandyq jáne sheteldik ınvestorlardy tartý jáne el ekonomıkasyn damytý maqsatynda ósirýge ruqsat etilgen sora ósimdikteri sorttaryn, ósirýge ruqsat etilgen kanabıs ósimdigindegi tetragıdrokannabınoldyń quramyn anyqtaý, sondaı-aq sora (kanabıs) ósimdikteriniń sorttaryn ónerkásiptik qaıta óńdeý jónindegi máselelerdi retteý usynyldy.
Úshinshiden, memlekettik shekarany kesip ótý kezinde keıbir adamdardy daktıloskopııalyq tirkeýden ótýden bosatýǵa qatysty túzetýler engizildi. Olar:
- shet memleketterdiń, úkimetterdiń, halyqaralyq uıymdardyń dıplomattyq mártebege teńestirilgen basshylary jáne olardyń otbasy músheleri;
- Qazaqstannyń qurmetti konsýldary jáne olardyń otbasy músheleri,
- Qazaqstanǵa qyzmettik ister boıynsha jiberiletin, dıplomattyq agentterge teńestirilgen mártebesi bar dıplomattyq pasporttardyń, sondaı-aq halyqaralyq uıymdar pasporttarynyń ıeleri;
- dıplomatııalyq poshtany tasymaldaıtyn dıplomattyq kýrerler – kýrerlik paraǵy bolǵan kezde dıplomattyq pasporttardyń ıeleri.
- Resmı sheteldik delegatsııalardy daktıloskopııalyq tirkeýden bosatý qysqa merzimdi saparlardy jeńildetedi jáne ortaq mindetterdi sheshýge ári birlesken maqsattarǵa qol jetkizýge basty nazar aýdarýǵa múmkindik beredi. Daktıloskopııalyq tirkeýden bosatylǵanyna qaramastan, vızalardy tekserý jáne resimdeý rásimderi áli de mindetti bolyp qala beredi, bul sheteldik azamattardyń Qazaqstan aýmaǵyna kirýi men kelýin baqylaýdyń jetkilikti deńgeıin qamtamasyz etýge múmkindik beredi, - dedi depýtat.
Sonymen qatar ol zań aıasynda qoǵamdyq oryndarda bet júzin tanýǵa kedergi keltiretin zattardy qoldanýǵa tyıym salynatynyn atap ótti.
- «Áskerı qyzmet jáne áskerı qyzmetshilerdiń mártebesi týraly» Zańǵa «dala tólemderi» degen uǵym engiziledi. Dala tólemderi áskerı qyzmetshilerge ǵana dala joryqtary, teńizge shyǵý, kemelerdiń oqý-jattyǵýlarǵa nemese joryqtarǵa bir táýlikten artyq qatysý kezeńi úshin 1,2 eselengen aılyq eseptik kórsetkish mólsherinde tólenedi. Dala tólemderi áleýmettik qorǵalýdy jaqsartýǵa, áskerı qyzmettiń bedelin arttyrýǵa, sondaı-aq áskerı qyzmetshilerdiń jaýyngerlik ázirlik sapasyn jaqsartýǵa múmkindik beredi, - dedi J. Amantaıuly.
Osy zań aıasynda turǵyn úımen qamtamasyz etýde birqatar jańa tásilder usynylady, olardy iske asyrý bólinetin bıýdjetti utymdy jáne birkelki paıdalanýǵa, turǵyn úı tólemderi tetigimen barlyq kúsh blogyn birdeı qamtýǵa múmkindik beredi. Qoldanystaǵy normalar turǵyn úıdi jalǵa alýǵa jáne jóndeýge beriletin qarajatty qolma-qol aqsha etip alýǵa múmkindik beretini jasyryn emes. Baqylaý tetigi joq. Jańa normalar bul olqylyqtardy jabady, qyzmetkerdi baspana alýǵa yntalandyrý arqyly uzaq merzimdi jalǵa alýdy tıimsiz etedi.
- Túzetýlermen taǵy bir tujyrymdamalyq másele, 20 jyldan astam eńbek sińirgen barlyq qyzmetkerlerge turǵyn úıdi óteýsiz jekeshelendirý quqyǵy sheshilip jatyr. Buǵan deıin bul tek áskerı qyzmetshilerde, arnaýly memlekettik organdarda jáne Іshki ister mınıstrliginde bolǵan, - dedi depýtat.
Májilistiń Zańnama jáne sot-quqyqtyq reforma komıtetiniń málimetinshe, naqtylaý sıpatyndaǵy túzetýler qamtyldy. Atap aıtqanda, mynalar usynylady:
- ákimshilik qamaýǵa alynatyn adamdardy qabyldaý-bólý oryndarynda ustaý tártibin aıqyndaý;
– «jergilikti polıtsııa qyzmeti» degen uǵymdy alyp tastaý;
- kóliktegi polıtsııa bólimsheleri salasynda «jelilik» degen termındi «kóliktegi» degen termınmen aýystyrý.
Eske salsaq, osy zań Májiliste birinshi oqylymda bıyl 16 sáýirde qaralǵan edi. Sol kezde «jergilikti polıtsııa qyzmeti» degen uǵymy joıylatyny aıtyldy.