Qoǵamdyq kelisimdi saqtaýda medıatsııanyń róli zor – sarapshylar

ASTANA. KAZINFORM - Qoǵamdyq kelisimdi arttyrýda medıatorlardyń zor úles qosyp júrgeni ańǵarylady. Astana qalasyndaǵy Dostyq úıinde medıatsııanyń qoǵamdaǵy róli jaıly talqylady.

– Etnosaralyq qarym-qatynas salasynda medıatorlardyń róli erekshe. Qazir elimizde medıatorlardyń kómegine júginýshilerdiń sany artyp keledi. Astana qalasy Qazaqstan halqy Assambleıasynyń medıatsııa keńesi – Qazaqstan halqy Assambleıasy janyndaǵy konsýltatıvtik-keńesshi organ. Kásibı medıatorlar jumys isteıdi. Aqysyz zań keńesin turaqty júrgizedi, – dedi kásibı moderator Roza Bekısheva.

Jıyn barysynda L.N. Gýmılev atyndaǵy EUÝ doktory (PhD) Symbat Shákirov tarıhqa kóz tastady.

– Ertedegi bir bıdiń ózi osy kúngi sottyń da, prokýrordyń da, polıtsııanyń da, ıaǵnı qanshama mekeme, uıymnyń da qyzmetin atqaryp kelgen. Bı bolyp belgilenetin tulǵalar óziniń tapqyrlyǵy men sheshendigin, ádil tórelik aıta alatyn qasıetin kópshilik aldynda kórsete bilgen. Barynsha adal, eshkimge bura tartpaıtyn, týra sóıleıtin naǵyz sheshen ári halyqtyń kókeıindegisin aıtqan ádilet jarshysy bolǵan, – dedi ǵalym.

Qoldanbaly etnosaıası zertteýler ınstıtýty dırektorynyń orynbasary Lýıza Ýzarovanyń aıtýynsha, etnosaralyq daýdy eshqashan saıası máselege aınaldyrýǵa bolmaıdy.

– Kóbi medıatsııa men etnomedıatsııanyń aıyrmashylyǵy nede? Etnosaralyq qatnas – óte názik nárse. Ózge ulttyń ókiline aıtylǵan jaman sóz búkil ultqa aıtylǵandaı qabyldanady. Mundaı keleńsizdikterdi sheshýde etnomedıatorlar óte zor eńbek sińiredi. Jalpy, elimizde ultaralyq qaqtyǵystar jıi tirkelmeıtini qýantady, – deıdi ol.