Qoǵamda kelisim men turaqtylyqty nyǵaıtý - ortaq mindet - BQO ishki ister basqarmasynyń bastyǵy T.Imashev
kezeńde qoǵamda kelisim men turaqtylyqty nyǵaıtý - barshaǵa ortaq mindet. Bul týraly QazAqparat tilshisine Batys Qazaqstan oblystyq ishki saıasat basqarmasynyń bastyǵy Tilekqabyl Imashev málim etti. Onyń aıtýynsha, memleketimizdiń azamattyq qoǵam qurý men elde demokratııalyq úrdisterdi damytý baǵytyndaǵy saıasatyna buqaralyq aqparat quraldaryn jan-jaqty jumyldyrý úshin olardyń mártebesin kóterip, abyroıyn aspandatýymyz qajet.
Búginde materıaldyq baılyqqa degen jappaı umtylys rýhanı baılyqtarymyzdyń qunsyzdanýy esebinen órbip jatqandaı kórinedi de turady. Sondyqtan qoǵamǵa jańa kózqaras, basqa jol qajet. Ýaqyt tynysy, ómir kóshi osyǵan jetelep otyr. Quqyqtyq memleket qurý jolyndaǵy buqaralyq aqparat quraldaryna bilim, kásiptik daıyndyq, kúshtilik jáne ulttyq birlik qajet. Al osylardyń bári qosylyp sana men rýhanı baılyǵymyzdyń keregesin qurap, shańyraǵyn kóterip, ýyǵyn shanshýy tıis.Qoǵam men memleket damýynda saıasat pen ekonomıkanyń salmaǵy qanshalyqty basym bolsa, onyń buqaralyq aqparat quraldarynyń zańdyq tetikteri de sonshalyqty bedelge ıe bolýy tıis. Bul jolda qoǵamdaǵy quqyqtyq mádenıettiń deńgeıi zańǵa erekshe qurmettiń, ony sózsiz moıyndaýdyń jáne zańdar turaqtylyǵynyń deńgeıimen ólshenetinin eskergenimiz jón. Urpaqtyń boıyna buqaralyq aqparat quraldary arqyly otanshyldyq, iskerlik, jaýapkershilik qasıetterdi qalyptastyrmaı, sondaı-aq ótken býynnyń áleýmettik-mádenı tájirıbesin, álem órkenıeti jetistikterin ıgerýine jol ashpaı, áleýmettik ustanymdaǵy ekonomıkasy bar alǵy sheptegi qoǵam qurý múmkin emes. Qalaı desek te, memleket bıliginiń tórtinshi tarmaǵy ispettes buqaralyq aqparat quraldary óz kezeginde memleketti damytady, ultqa tuǵyr, ulysqa tirek bolady.
1995 jyly Prezıdent N.Nazarbaevtyń "Qazaqstan halqy Assambleıasyn qurý týraly" Jarlyǵy shyqqany málim. Bıyl Assambleıanyń qurylǵanyna 15 jyl tolyp otyr. Qazaqstandyq jáne ulttyq otansúıgishtikti qalyptastyrý, ultaralyq qatynastardy qadaǵalaý negizinde tatýlyq pen kelisimdi nyǵaıtý, Qazaqstandy meken etken ult ókilderi arasynda dostyq qarym-qatynastardyń damýyna negiz bolatyn memlekettik saıasat júrgizý jóninde usynystar daıyndaý isimen aınalysý naq osy Assambleıa jumysynyń negizgi ózegine aınaldy.
Oblys kóleminde ultaralyq saıasat pen onyń damý baǵytyn qalyptastyrýda atalǵan qujattyń negizgi basymdyqtary eskerilip, ólkemizde ómir súrip otyrǵan barlyq ult ókilderiniń teń quqyǵyn qamtamasyz etý basty nysanaǵa alyndy. Atalǵan qujattardy oryndaý úshin oblys ákiminiń basshylyǵymen, memlekettik jáne quqyq qorǵaý organdarynyń qatysýymen janjaldy retteıtin jumys komıssııasy quryldy. Aımaqtaǵy qoǵamdyq pikirdi anyqtaý úshin resmı jáne beıresmı zertteýler únemi júrgizilýde. Atap aıtsaq, 2009 jyly «Batysqazaqstandyqtardyń baǵalaýyndaǵy ultaralyq jáne konfessııaaralyq dıalogy» atty áleýmettik saýalnama júrgizildi. Zertteýge 2 myń respondent tartyldy. Saýalnamaǵa qatysqandardyń 77,7 %-y ultaralyq qatynastar salasyn mańyzdy dep esepteıdi.
Jalpy alǵanda, BQO-da suralǵan turǵyndardyń 92 paıyzy qazaqstandyq qoǵamdaǵy ultaralyq qatynastardyń jaǵdaıyn joǵary baǵalady. Oblystyq deńgeıde 14 ulttyq mádenı-aǵartý ortalyǵy jumys jasaıdy. Olardyń qatysýymen ultaralyq saıasatty iske asyrýda oblys aýmaǵyndaǵy dıasporalardyń shyǵý tarıhy men ózge eldermen dostyq qatynastardy damytýǵa baǵyttalǵan ártúrli konferentsııalar, festıval, konkýrs, semınarlar men dóńgelek ústelder ótkizilip turady. Sharalarǵa etnomádenı birlestikter, memlekettik organdar, úkimettik emes uıymdar shaqyrylyp, qatystyrylyp otyrady. Etnomádenı birlestikter qoǵamdyq kelisimdi nyǵaıtý baǵytynda jarııalanǵan baıqaýlarǵa belsendi qatysýda. Aımaqtaǵy qoǵamdyq kelisim men birlikti nyǵaıtý maqsatynda jáne etnıkaaralyq saladaǵy ahýaldy jaqsarta túsý úshin mynadaı taqyryptarda konkýrstar jarııalandy: «Ulttyq rýhanı qundylyqtardy nasıhattaý jáne oqytý boıynsha jumystardy uıymdastyrý», «Ádebıet pen saz ónerindegi toleranttylyqty adamzattyń rýhanı murasy men estetıkalyq tárbıesi retinde qoldaný», «Biz - birtutas Qazaqstan halqymyz», «Etnıkaaralyq kelisimdi nyǵaıtýǵa baǵyttalǵan is-sharalar qataryn uıymdastyrý jáne ótkizý», «Etnıkaaralyq jáne konfessııaaralyq kelisimniń qazaqstandyq modelin jetildirý problemalary men perspektıvalary (oqý-ádistemelik materıaldar jasaqtaý)» taqyrybynda is-sharalar keshenin ótkizý, «Ultaralyq jáne konfessııaaralyq kelisim boıynsha semınar-trenıngter ótkizý». Atalmysh jobalardy oryndaý aımaqtaǵy ultaralyq saıasat pen onyń aldaǵy ýaqyttaǵy damý baǵyttaryna paıdaly ári tyń usynystar ákeldi.
Іshki saıasat basqarmasynyń bastamasymen oblystyq pedagog kadrlar biliktiligin arttyrý jáne qaıta daıarlaý ınstıtýtynda qala jáne aýdan mektepteriniń dintanýshy muǵalimderimen «Qazirgi qoǵamdyq-saıası ómirdegi dinniń orny jáne mektepterde dintanýdy oqytý máseleleri» atty oblystyq semınar uıymdastyryldy. Atalǵan shara aıasynda oblystyq ishki saıasat basqarmasy men ádilet departamenti, qalalyq ishki saıasat bóliminiń mamandary men dástúrli dinı birlestikterdiń ókilderi dáris oqyp, dóńgelek ústel ozdyryldy.
Basqarma qoldaýymen «Qazaqstan koreıler assotsıatsııasy» respýblıkalyq qoǵamdyq birlestigi «Biz - Qazaqstannyń birtutas halqymyz» atty áleýmettik joba aıasynda birqatar sharalardy iske asyrdy. Olardyń qatarynda «Qazaqstannyń birtutas halqyn quraıtyn ulttardyń kórnekti tulǵalary» atty ǵylymı-tájirıbelik konferentsııa, «Qazaqstannyń tutas halqyn qurýdyń ahýaly men keleshegi» taqyrybyndaǵy dóńgelek ústel jáne «Men qazaq halqynyń tili men salt-dástúrin dáripteımin» baıqaýyn atap ótýge bolady. Qatysýshylarǵa qurmet gramotasy berilip, baǵaly syılyqtar tabys etildi.
«Bizdiń qoǵamdaǵy konfessııaaralyq kelisim ulttyq birliktiń mańyzdy quramdas bóligi bolyp esepteledi. Halqymyzdyń tatýlyǵy men birligi - elimizdiń órkendep, alǵa basýynyń basty sharty. Halqymyz «El tynysh bolsa, eńbek eseli» demeı me, sondyqtan joǵaryda atalǵan baǵyttaǵy jumystar óz jalǵasyn tabatyn bolady», dep túıindedi oıyn T.Imashev.
