Qoǵamda bilim ústemdigin qalyptastyratyn kez keldi - Prezıdent

ASTANA. QazAqparat – Bilim berý jáne ǵylym salasy árdaıym memlekettiń nazarynda bolady. Bul týraly halyqtyq koalıtsııa forýmynda QR Prezıdenti Qasym-Jomart Toqaev aıtty, dep habarlaıdy QazAqparat tilshisi.

«Men qoǵamda zańdylyq pen tártiptiń qatań saqtalýyna basa mán beremin. Muny únemi aıtyp júrmin. Osy rette, turmystyq zorlyq-zombylyq, adam jáne esirtki saýdasy úshin jaza kúsheıtildi. Brakonerlikke qarsy zańdardy qataıttyq. Tabıǵatty qorǵaý jumysyn memlekettik deńgeıge kóterdik. «Jurtqa jaqyn polıtsııa» qaǵıdaty boıynsha tártip saqshylarynyń qyzmetin reformalaý bastaldy», - dedi Memleket basshysy prezıdenttikke Qasym-Jomart Toqaevtyń kandıdatýrasyn qoldaý jónindegi halyqtyq koalıtsııanyń forýmynda.

Prezıdent bilim, ǵylym salasyn damytýǵa aıryqsha nazar aýdarylatyndyǵyn basa aıtty.

«Qala jáne aýyl mektepteri arasyndaǵy aıyrmashylyqty joıý úshin naqty sharalar qolǵa alyndy. Bilim sapasy tómen joǵary oqý oryndary jabyla bastady. Daryndy jastardy qoldaý úshin «Táýelsizdik urpaqtary» atty grant berile bastady. Jas ǵalymdarǵa álemniń bedeldi ǵylymı ortalyqtarynda ozyq bilim alý úshin 500 jáne «Jas ǵalym» jobasy aıasynda 1000 grant bólindi. Jalpy, bilim berý jáne ǵylym salasy árdaıym memlekettiń nazarynda bolady. Men bul salalarǵa erekshe mán beremin. Qoǵamda bilim ústemdigin qalyptastyratyn kez keldi», - dedi Qasym-Jomart Toqaev.