Qoǵam jasandy ıntellekt taratqan aqparatqa tym qatty senedi - IT sarapshy

ASTANA. KAZINFORM — Jasandy ıntellekti derekterine qatysty synı kózqaras bolý kerek. Bul týraly Kazinform agenttiginiń BIZDIÑ ORTA podkastynda IT sarapshy Tımýr Bektur málim etti.

- Qaýipti bir máselege toqtalsam, jalpy qoǵam tym sengish. ChatGPT sekildi jasandy ıntellekt tehnologııalary barshylyq, ıaǵnı birneshe túri bar. Adamdar jasandy ıntellekti taratqan aqparatqa tym qatty senip jatqanyn baıqap júrmiz, bul derekterdi 100 paıyz qabyldaıdy. Atap aıtqanda, adam balasy únemi óziniń synı oılaý qabiletine mán berýi kerek. Bul turǵyda jasandy ıntellektige 100 paıyz sene berýge bolmaıdy, - dedi T. Bektur.

Onyń aıtýynsha, mamandarda jasandy ıntellektini paıdalaný kezinde alǵan nátıjeni baǵalap, teksere alatyndaı qabilet bolady.

- Al qabiletinen tys taqyrypta jasandy ıntellektige tapsyrma bergen adamdarda tekserip alatyndaı múmkindigi bolmaı jatady nemese tekserýge mán bermeıdi, - dedi sarapshy. 

Óz kezeginde CodiPlay-diń bas atqarýshy dırektory Danabek Qalıajdarov aqparattyq qaýipsizdikke erekshe nazar aýdarý kerek ekenin aıtty.

- Adamdar óz ómirinde kópshiliktiń kózinen jasyratyn jumystaryńyzdy nemese derekterin ınternetke júktemeýi tıis. Áleýmettik jelide, ǵalamtorda «gıgıenany» saqtaý kerek. Otbasyndaǵy qupııany ınternetke júktemeý qajet, - dedi D. Qalıajdarov.

Budan buryn habarlaǵandaı, Qazaqstanda óndiris salasyna jasandy ıntellekti engizýdi kózdeıtin Jol kartasy bekitildi. 

Jaqynda, mektepterde jasandy ıntellektini jaýapkershilikpen qoldaný boıynsha oqytý bastaldy.