Qoǵam qaıratkeri Ǵalym Dosken dúnıeden ozdy

ASTANA. KAZINFORM — Belgili qalamger, qoǵam qaıratkeri, rejısser-stsenarıst, medıamenedjer Ǵalym Dosken dúnıeden ozdy. Bul týraly Mádenıet jáne aqparat mınıstrligi habarlady. 

— Mádenıet jáne aqparat mınıstrligi belgili qalamger, qoǵam qaıratkeri, rejısser-stsenarıst, medıamenedjer Ǵalym Doskenniń dúnıeden ozýyna baılanysty marqumnyń otbasy men týǵan-týystaryna qaıǵyra kóńil aıtady, — delingen mınıstrlik habarlamasynda.

Ǵalym Tólembekuly — elimizdiń mádenıeti men ádebıetiniń, teleradıo salasynyń damýyna, ulttyq jýrnalıstıkanyń qalyptasýyna súbeli úles qosqan kórnekti tulǵa.

Ol «Ulan» gazetiniń bas redaktory, «Qazaqstan» teleradıokorporatsııasynyń tóraǵasy qyzmetterin atqaryp, birneshe mańyzdy mádenı jobalardy júzege asyrdy.

Sonyń ishinde «Qazaqtyń dástúrli 1000 áni» men «Qazaqtyń dástúrli 1000 kúıi» atty antologııalyq jınaqtardyń avtory retinde ulttyq ónerdiń baǵa jetpes murasyn keler urpaqqa jetkizdi.

Rejısser ári stsenarıst retinde «Kıeli jerler», «Joǵalǵan jaryq hronıkasy» sekildi derekti fılmderdi dúnıege ákelip, qazaq halqynyń rýhanı qazynasyn keńinen nasıhattady.

— Ómirin sóz óneri men ult mádenıetine arnaǵan Ǵalym Tólembekulynyń jarqyn beınesi men ulttyq mádenıetimizge sińirgen ólsheýsiz eńbegi halyq jadynda máńgi saqtalady dep senemiz. Ultyna adal qyzmet etken abzal azamattyń jany jánnatta, ımany salamat bolǵaı, — delingen habarlamada.