Kodekske qaıshy: Shymkentte Densaýlyq saqtaý basqarmasy 26 stomatologııaǵa monıtorıng júrgizbek bolǵan
ShYMKENT. KAZINFORM – Shymkent qalasynda Densaýlyq saqtaý basqarmasynyń buıryǵymen emhanalar janyndaǵy 26 stomatologııalyq kabınetke barý arqyly monıtorıng júrgizý josparlanǵany anyqtaldy. Alaıda, Halyq densaýlyǵy jáne densaýlyq saqtaý júıesi týraly kodeksine sáıkes basqarmanyń mundaı monıtorıng júrgizýge ókilettigi joq. Bul týraly prokýratýra málim etti.
— Prokýrorlyq qadaǵalaý aktisi negizinde atalǵan buıryqtyń kúshi joıyldy, al kásipkerlik qyzmetke zańsyz aralasqany úshin Densaýlyq saqtaý basqarmasynyń basshysy Ákimshilik quqyq buzýshylyqtýraly kodeksiniń 173-baby boıynsha jaýapkershilikke tartylyp, 196 600 teńge mólsherinde aıyppuldy qysqartylǵan tártippen tóledi, — delingen habarlamada.
Memlekettik mańyzy bar ınvestıtsııalyq jobalardy súıemeldeý jumystary jalǵasyp jatyr. Prokýratýra eger bıznes sýbektilerinde qandaı da bir problemalyq suraqtar týyndasa, olar +7-707-615-00-10 nómiri boıynsha Kásipkerler men ınvestorlardyń quqyqtaryn qorǵaý Call-ortalyǵyna nemese Shymkent qalasy, Erımbetov kóshesi, 304g, «Zańǵar» Bıznes ortalyǵy ǵımaratyndaǵy Front-ofıske júgine alatynyn habarlady.
Memleket basshysynyń tapsyrmasyna sáıkes, prokýrorlyq qadaǵalaý ınvestorlardyń máselelerin tıimdi sheshýge baǵyttalǵan. Osy baǵyttaǵy quraldardyń biri — kásipkerler men ınvestorlardyń quqyqtaryn qorǵaý jónindegi mobıldi toptyń jumysy. Mysaly, mobıldi topqa kelip túsken sıgnal boıynsha prokýratýra medıtsınalyq qyzmet kórsetý salasyndaǵy ınvestorlarǵa qatysty zańsyz tekserýlerdiń aldyn aldy.
Búǵan deıin prokýratýra Jambyl oblysynda 930 bala arnaıy medıtsınalyq tekseristen ótpegenin anyqtaǵan edi.