QMDB Palestınadaǵy qantógiske baılanysty málimdeme jasady
Qazaqstan musylmandary dinı basqarmasy Islam dinindegi qasıetti úshinshi meken sanalatyn Qudys jerinde bolyp jatqan qantógiske qatty alańdaýshylyq bildirip, qanshama jyldan beri sheshimin tappaı kele jatqan máseleniń beıbit jolmen, ózara ymyra aıasynda sheshilýin tiledi, dep habarlaıdy Kazinform muftyat.kz-ke silteme jasap.
«Adamzat balasyn birlik pen ıgilikke shaqyrǵan paıǵambarlar izi qalǵan qasıetti mekenniń búginde soǵys alańyna aınalyp, myńdaǵan beıkúná jandardyń, ásirese sábıler men beıbit turǵyndardyń oqqa ushyp, qaza tabýy barshamyzdyń janymyzǵa qatty batýda. Aýyr jaraqat alyp, úreı qushaǵynda ómir súrip otyrǵan jandardyń tez saýyǵyp ketýin tileımiz.
Qazaqstan musylmandary dinı basqarmasy taraptardy beıbit kelisimge kelýge jáne qantógisti shuǵyl toqtatyp, halyqqa zarar keltirmeýge úndeıdi.
Sondaı-aq Palestına halqynyń halyqaralyq kelisimder men rezolıýtsııalarda bekitilgen tarıhı quqyǵyn qoldaıtynyn málimdeımiz.
Elimizdegi barsha musylman qaýymyn qasıetti mekenniń tynyshtyǵy men amandyǵy úshin duǵa jasaýǵa shaqyramyz. Alla Taǵala jer betin túrli búlikter men soǵystan aman etkeı. Ámın!», - dep jazylǵan QMDB málimdemesinde.
