QMDB: Qurban aıttyń birinshi kúninde 17 997 otbasyǵa et taratyldy

NUR-SULTAN. QazAqparat - Qazaqstan musylmandary dinı basqarmasynyń (QMDB) qoǵam aldyndaǵy negizgi 4 qyzmetiniń biri – qaıyrymdylyq sharalaryn uıymdastyrý, dep habarlaıdy QazAqparat QMDB-nyń resmı saıtyna silteme jasap.

QMDB kómekke muqtaj jandardy qoldaý, qaýipti indettiń aldyn alý maqsatynda WWW.QURBAN2020.KZ saıtyn iske qosqan bolatyn.

Jobanyń maqsaty – qaıyrymdylyqqa dáneker bolý, halyqtyń densaýlyǵy men ómirine tóngen qaýipti seıiltýge úles qosý, qurban shalýǵa nıet bildirgen jandarǵa karantın jaǵdaıynda ońtaıly jol usyný, t.b.

«Qurmetti qaýym!

WWW.QURBAN2020.KZ jobasy boıynsha júıeli esep berip turatynymyz jaıly osyǵan deıin ózderińizge habarlaǵanymyzdaı, 2020 jyldyń 31 shildesi saǵat 15:00-degi málimet boıynsha respýblıka deńgeıinde 3225 adam qurbandyq shalýǵa tapsyrys berdi. Budan bólek 1000-nan astam adam Alla razylyǵy úshin qosymsha qurbandyq malyn ákelip tapsyrdy. Búgin, ıaǵnı Qurban aıttyń birinshi kúninde elimiz boıynsha 4 700 mal shalyndy. Onyń ishinde qoı – 4341, iri qara – 274, eshki – 83 , túıe – 2. Buǵan qosa 22 kásiporyn men mekemeler qurbandyq malyn tapsyrdy. Barlyq málimetti jınaqtap aıtqanda, elimiz boıynsha 17 997 otbasyǵa qurbandyq eti taratyldy.

Qadirli otandastar!

Halqymyzda: «Qaıyrymdylyq jasasań, qaıyryn óziń kóresiń» degen naqyl sóz bar. Barshańyz shynaıy nıetpen qurban shalyp, muqtaj otbasylarǵa merekelik qýanysh syılap, saýapty iske ortaqtasyp otyrsyzdar.

Asa Qamqor, Erekshe Keńshilik Iesi bolǵan Alla Taǵala osy amaldaryńyzdyń saýabyn arttyryp, óz quzyretinde qabyldyqqa jazǵaı. Saýaby mol qaıyrymdylyq istiń jaqsylyǵy ózderińizge eselep qaıtyp, halyqtyń alǵysy men batasyna bólene berińizder. Kómek alǵan jandardyń sizderge joldaǵan duǵa-tilekteri qabyl bolǵaı. Jaratqan Jabbar Iemiz mereılerińizdi ústem etip, eki dúnıeniń nyǵmeti men qurmetine bólenýdi násip etkeı. Ámın!»,-delingen habarlamada.