556 mln teńge paıda tapqan: Qostanaıda zańsyz mıkrokredıt bergen adam ustaldy

ASTANA. KAZINFORM – QMA Qostanaı oblysy boıynsha departamenti zańsyz mıkroqarjylyq qyzmet faktisi boıynsha sotqa deıingi tergep-tekserý júrgizip jatyr. 

Kúdikti alty jyl boıy tıisti lıtsenzııasyz, «OLX» jáne «Instagram» mobıldi qosymshalary arqyly paıyzymen qaryz berýmen aınalysqan.

— Zańsyz áreketter zańdy túrinde kórsetilip, onda naqty berilgen somadan áldeqaıda joǵary sandar kórsetilgen. Óıtkeni oǵan jyldyq 100%-ǵa deıin aldyn ala eseptelgen syıaqylar engizilgen. Qaryzdyń qaıtarylýyn qamtamasyz etý maqsatynda qaryz alýshylardyń múlki kepildikke qoıylǵan. Atalǵan shema boıynsha kúdikti jalpy somasy 556 mln teńgeden asatyn 72 mámile jasaǵan, — delingen QMA habarlamasynda.

Solardyń biri — Rýdnyı qalasynyń zeınetkerimen jasalǵan kelisim. Ol kúdiktiden emdelýge qajet dep 13,2 mln teńge kóleminde qaryz alǵany týraly kelisimge otyrǵan. Kelisim sharttaryna sáıkes, zeınetker eki jyl boıy aı saıyn 600 myń teńgeden tóleýge mindettelgen.

— Alaıda, is júzinde ol qolyna tek 6 mln teńge ǵana alǵan, al qalǵan 7,2 mln teńge aldyn ala eseptelgen paıyz retinde kórsetilgen. Qaryzdy qamtamasyz etý úshin ol óziniń jalǵyz páterin kepildikke qoıýǵa májbúr bolǵan, — delingen habarlamada.

Mundaı aýyr ári ádiletsiz talaptar azamattar úshin úlken qaýip týdyrady, olar aldanyp, óz múlkinen aıyrylyp qalý qaýpine ushyraıdy.

Sot sanktsııasymen kúdiktiniń jalpy quny 154 mln teńge bolatyn múlkine tyıym salyndy. Olardyń ishinde 6 jeke turǵyn úı, 3 avtokólik («TANK 500», «TOYOTA CAMRY», «MITSUBISHI FIGHTER») bar.

Tergep-tekserý jumystary jalǵasyp jatyr.

QPK-niń 201-babyna sáıkes ózge aqparat jarııa etýge jatpaıdy.

Aıta ketelik quny 2,6 mlrd teńge bolatyn temekini elimizge zańsyz kirgizgender sottalǵan edi.