QQS boıynsha kimder qashan esepke turýy kerek — Jańa kodeks
ASTANA. KAZINFORM — Memlekettik kirister komıteti jańa Salyq kodeksi boıynsha QQS tóleýge kimder mindetti ekenin jáne qashan tirkelý qajettigin túsindirdi.
Komıtettegi QQS ákimshilendirý basqarmasynyń basshysy Edil Ázimshaıyqtyń aıtýynsha, jańa tártip 2026 jyldyń 1 qańtarynan bastap kúshine enedi jáne esepke alýdyń 3 túrin — erikti, mindetti, shartty esepke alýdy qarastyrady.
QQS boıynsha erikti esepke turý múmkindigi jyldyq aınalymy shekti mólsherge jetpegen salyq tóleýshilerge ǵana beriledi (10 myń AEK, 2026 jyly – 43,2 mıllıon teńge). Alaıda QQS boıynsha tirkeýden bosatylǵandar – memlekettik mekemeler, salyq tóleýshi mártebesi joq sheteldik kompanııalardyń fılıaldary, jeke tájirıbemen aınalysatyndar, arnaıy salyq rejımderin qoldanatyndar óz erkimen bolsa da tirkeýge tura almaıdy.
Mindetti túrde esepke alý – jyldyq aınalymy 10 myń AEK-ten asqan, ıaǵnı keler jyly 43,2 mıllıon teńgeden asatyn salyq tóleýshilerge qatysty bolmaq. Eger kásipker tabysy osy shekti mólsherden assa, 5 jumys kúni ishinde salyq ótinishin berýi kerek. Eger qandaı da bir mámile shekti mólsherden asatyn bolsa, ony jasaýǵa deıin ótinish berý qajet jáne kásipker mámileni QQS tóleýshi retinde júrgizýge mindetti.
Eger aınalym shekti mólsherden assa, biraq kompanııa esepke alynbasa, bul aınalymǵa salyq salynýy kerek dep esepteledi jáne kásipker ákimshilik jaýapkershilikke tartylýy múmkin. Sonyń ishinde aıyppul ótinish berilmegen kezeńdegi aınalym somasynyń 15 paıyzyn quraýy múmkin. Sol sebepti komıtet QQS boıynsha der kezinde esepke turýǵa keńes beredi.
Al shartty esepke alý ınternet-saýdamen aınalysatyn nemese qazaqstandyqtarǵa elektrondyq qyzmetter kórsetetin sheteldik kompanııalar úshin qarastyrylǵan. Bul úshin salyq organdary sheteldik salyq tóleýshi kompanııalar tizimin jasaıdy.
– Shartty tirkeýden ótý úshin sheteldik kompanııa salyq organyna qajetti málimeti bar rastaý hatyn jiberedi. Muny Qazaqstandaǵy satyp alýshydan alǵashqy tólem túsken kúnnen bastap bir aı ishinde jasaý qajet. Derekter ózgergen jaǵdaıda kompanııa salyq organyn 10 jumys kúni ishinde habardar etýge mindetti, - dedi E.Ázimshaıyq.
Sheteldik kompanııany QQS tóleýshi retinde taný kúni – satyp alýshynyń alǵashqy tólem jasaǵan kúni bolyp esepteledi.
– Qazirgi ýaqytta Apple, OpenAI sekildi negizgi, úlken ınternet alańdar tirkelip, 16 paıyz stavkamen salyq tólep otyr. Sáıkesinshe olarǵa jańa jylda qaıtadan tirkelý mindetti emes. Jańa Salyq kodeksi boıynsha eshbir jańa talap qoıylmaıdy. Eger sheteldik kompanııalar salyǵyn ýaqytynda tólemese, qosymsha ósimpulymen birge tóleıdi. Biz habarlama jibergennen keıin de, salyq tólemese, tirkelmese, ınternet-resýrstarǵa shekteý qoıylyp, buǵattalady, - dep tolyqtyrdy E.Ázimshaıyq.
Buǵan deıin QQS boıynsha tirkeý talaptaryn buzǵandarǵa qandaı shara qoldanylatyny habarlanǵan edi.