KQK-ǵa jasalǵan shabýyldardan keıin Qashaǵan munaıy Qytaıǵa baǵyttalady

ASTANA. KAZINFORM – Energetıka mınıstrligi Kaspıı qubyr konsortsıýmy (KQK) ınfraqurylymyna jasalǵan drondyq shabýyldardan keıin Qashaǵan ken ornynan óndiriletin munaıdyń eksporttyq baǵyttaryn qaıta qaraýǵa kiristi. 

Mınıstrliktiń málimetinshe, KQK-nyń teńiz termınalyna jasalǵan shabýyldar munaı eksportyn tolyq toqtatpaǵan. Qaýipsizdik talaptaryn saqtaı otyryp, jumys istep turǵan port ınfraqurylymy arqyly jóneltý jalǵasyp jatyr.

– Qazirgi ýaqytta mınıstrlik júk jóneltýshilermen birlesip, munaı kólemderin jedel túrde qaıta bólý jumystaryn júrgizip jatyr. Sonyń ishinde Qashaǵan munaıynyń belgili bir bóligi Qytaıǵa baǵyttaldy. Ahýal Energetıka mınıstrliginiń turaqty baqylaýynda bolady, - dep atap ótti vedomstvodan.

Buǵan deıin Kaspıı qubyr konsortsıýmyna jasalǵan shabýylǵa baılanysty Qazaqstan narazylyq bildirgen edi. 

Sonymen qatar Kaspıı qubyr konsortsıýmy jelisimen munaı tasymaldaý nege toqtatylǵanyn jazǵanbyz.