KQK arqyly Qazaqstan munaıyn aıdaý kólemi qysqara ma

ASTANA. KAZINFORM – Kúni keshe dron shabýylyna ushyraǵan Kaspıı qubyr konsortsıýmy tóńireginde qarama-qaıshy ahýal týyndap otyr. Naqtyraq aıtqanda, aqparatta árkelkilik bar.

Kaspıı qubyr konsortsıýmynyń «Kropotkınskaıa» munaı aıdaý stansasy dron shabýylyna ushyraǵannan keıin elimizdiń Energetıka mınıstrligi Qazaqstan munaıy úshin KQK tarapynan esh shekteý joqtyǵyn, munaıdy qabyldaý shtattyq rejımde júzege asyrylyp jatqanyn málimdegen edi.

Alaıda, reseılik «Transneft» kompanııasynyń resmı saıtynda jarııalanǵan aqparatta Qazaqstan tarapynan munaı aıdaý kóleminiń qysqarýy múmkin ekendigi aıtylady.

- KQK mamandarynyń paıymynsha, atalǵan soqqy saldary 1,5 aıdan 2 aıǵa deıingi ýaqytta joıylady. Bul Qazaqstannan munaı kólemin shamamen 30 paıyzǵa tómendetýge alyp kelýi múmkin, - delingen kompanııa aqparatynda.

Osy jaıtqa baılanysty BAQ ókilderi elimizdiń Energetıka mınıstrliginiń baspasóz qyzmetine júgingen edi. Vedomstvo «qazirgi ýaqytta atalǵan máseleniń barlyq mán-jaıy anyqtalyp jatqanyn, aqparat anyqtalǵanda birden túsinikteme beriletindigin alǵa tartady.