QKHP kandıdatynyń ókili Stepnogorsk qalasynda boldy

NUR-SULTAN. QazAqparat - Qazaqstan Kommýnıstik Halyq partııasynyń (QKHP) atynan QR Prezıdenttigine kandıdat Jambyl Ahmetbekovtyń Aqmola oblystyq saılaýaldy shtabynyń jetekshisi Beısenbaı Májıtov Stepnogorsk qalasyndaǵy «Tselıngormash» mashına jasaý zaýytynyń ujymymen kezdesti. Bul týraly QazAqparat QKHP baspasóz qyzmetine silteme jasap habarlaıdy.

Zaýyt basshylary shtab jetekshisin-senim bildirilgen ókildi óndiristik tseh jumysymen tanystyrdy. Іs barysynda B.Májıtovke kásiporynnyń tól ónimderdi kórsetildi.

«Mashına jasaý óndirisi - ındýstrııalyq baǵytta damyǵan eldiń ulttyq ekonomıkasynyń negizgi ári mańyzdy salalarynyń biri. Dál osy sala qazyna qarjysyn eseleýge, adamdardyń jumyspen qamtylýyna, sonymen qatar olardyń ál-aýqatynyń artýyna ólsheýsiz úles qosady», - dedi Aqmola oblystyq saılaýaldy shtabynyń jetekshisi.

Budan keıin B.Májıtov jınalǵandardy QR Prezıdenttigine kandıdattyń saılaýaldy tuǵyrnamasymen tanystyrdy.

QR Prezıdenttigine kandıdattyń senimdi ókili qarapaıym eńbek adamy laıyqty jalaqy alý, jaıly jaǵdaımen qamtylý, áleýmettik jeńildikke ıe bolý syndy basymdyqtarǵa ıe ekenin jáne ony tıisinshe qoldaný qajettigin aıtty.

Kezdesýge kelgen qala turǵyndary B.Májıtovqa ózderin tolǵandyrǵan máseleler boıynsha suraq qoıdy. Ol ár adamnyń qymbatshylyqqa, zeınet jasyna, turǵyn úıge, áleýmettik kómek pen járdemaqyǵa qatysty saýaldaryn muqııat tyńdap, naqty mysalmen jaýap berdi.

Aıta keteıik, «Tselıngormash» JShS zaýyty mashına jasaýmen aınalysady. Zaýyt taý-ken tehnıkasy qurylǵylaryn, energııa óndiretin nysandarǵa arnalǵan jabdyq, júk vagondaryna qosalqy bólshek sonymen qatar hımııa salasyndaǵy kásiporyndarǵa qosalqy bólshek shyǵarady.

Foto: knpk.kz