Qyzylshamen aýyrǵan naýqasty qalaı emdeıdi – maman jaýaby

Astana qalasy №3 kópbeıindi balalar aýrýhanasy dırektorynyń orynbasary Roza Ótegenova qyzylsha ınfektsııasyn juqtyrǵan naýqasty emdeý joldaryn aıtyp berdi, dep habarlaıdy Kazinform agenttigi. 

«Qyzylsha ınfektsııasynan emdeý týraly zerthanalyq hattama bar. Oǵan sáıkes vırýsqa qarsy dári-dármek beremiz. Al asqyný bolǵan jaǵdaıda antıbıotıkter taǵaıyndalady. Jalpy protogenetıkalyq em sharasyn qoldanamyz», - dedi Roza Ótegenova Astana qalalyq kommýnıkatsııalar qyzmeti alańynda ótken baspasóz máslıhatynda.

Brıfıng barysynda aıtylǵandaı, elordada vaktsınatsııa kúntizbesine sáıkes ekpe almaǵan balalardy anyqtaý jumystary júrip jatyr.

Osy kúnge deıin atqarylǵan jumys nátıjesinde qyzylshaǵa qarsy vaktsına almaǵan 13 000 bala jáne jasóspirim anyqtaldy. Búginde onyń 5 692-i ekpe alǵan.