Qyzylordalyq oqýshylar tótenshe jaǵdaıdy dál ýaqytynda habarlaıtyn platforma oılap tapty

Olar joba barysynda mıllıardtaǵan materıaldyq shyǵyn ákeletin tabıǵı jáne antropogendik faktorlardyń qaýpin eskergen.

— Qarjylaı shyǵynnan bólek bul másele qala turǵyndarynyń ómirine úlken qaýip tóndiredi. 2024 jyly Qazaqstanda 11 500-den astam órt, tabıǵı jáne tehnogendi sıpattaǵy 5500-den astam tótenshe jaǵdaı tirkelgen. Tek órtten kelgen materıaldyq shyǵyn 24 mlrd teńgeden asty. Tótenshe jaǵdaılar mınıstrliginen keletin SMS-habarlamalar baılanys operatorlaryna túsetin salmaqqa baılanysty kóbine keshigip jetedi. Jer silkinisi nemese sý tasqyny sııaqty jaǵdaılarda árbir mınýt sanaýly. Mundaıda tekserilmegen aqparat jıi taraıdy. Al ony saralaýǵa ýaqyt tapshy. Іri megapolıs turǵyndaryna qalanyń ekinshi shetindegi apat jaıly emes, óz qaýipsizdigin qamtamasyz etý úshin naqty ózi turǵan kósheler aýmaǵynda ne bolyp jatqanyn bilý mańyzdyraq, — dedi Danııar Aqdáýletov.

Oqýshylar joba Almaty, Astana jáne Shymkent sııaqty megapolısterde jedel qyzmet ókilderiniń oqıǵa ornyna der ýaqytynda jetýine, adam ómirin saqtap qalýǵa kómektesetinin aıtyp otyr. Ol, ásirese, borannan kóz ashpaıtyn, qurǵaqshylyqqa beıim óńirler úshin asa qajet. 

— Júıe beınebaqylaý kameralarynan túsetin beınederekter aǵynyn nemese paıdalanýshylar júktegen medıafaıldardy qabyldaıdy. Órt pen jol-kólik oqıǵalaryn avtomatty túrde anyqtaý úshin YOLOv8 mashınalyq oqytý modeli qoldanylady. Júıege engizilgen aqparat jasandy ıntellekt jáne aqparattyq tehnologııalar kómegimen óńdeledi. Onlaın serverlerge jazylyp, oqıǵalar kartasynda belgilenedi. Oqıǵanyń deńgeıine sáıkes sol aımaqtaǵy qala turǵyndarynyń uıaly telefonyna sol sátte habarlama jiberiledi, — dedi joba avtorlary.

Platforma jasandy ıntellekt jáne geoaqparattyq júıelerdiń múmkindigin biriktiredi. 
Buryn habarlaǵanymyzdaı, Qyzylorda qalasyndaǵy Nazarbaev zııatkerlik mektebiniń 10-synyp oqýshysy Aızere Jaqypbek sý tapshylyǵy kúrdelengen ýaqytta egis alqabyndaǵy ırrıgatsııalyq júıeni jetildirýdiń jolyn tapty.