Qyzylordalyq erekshe jup qalaı shańyraq kóterdi
QYZYLORDA. KAZINFORM — Qyzylordalyq taǵdyrly aqyn Nurmúhamed Ábilqasymov jubaıy Áıgerim Nurlanovadan 18 jas úlken. Al ekeýiniń tanystyǵy — óz aldyna bólek hıkaıa. Kazinform tilshisine suhbat bergen jarasymdy jup birin-biri jolyqtyrǵan sátti baıandap berdi.
Nurmuhamed Ábilqasymovty jurt aýzyna taıaqsha tistep, smartfon arqyly óleń jazatyn aqyn retinde tanıdy. Ol — «Taǵdyr men jaza», «Tasjarǵan» kitaptarynyń avtory.
Taǵy bir jyr jınaǵy qolǵa tıetin kún alys emes. Sondaı-aq halyqaralyq «Shabyt» festıvaliniń laýreaty, oblys ákimi taǵaıyndaǵan «Turan» syılyǵynyń ıegeri.
Áıgerim ekeýiniń shańyraq kótergenine bıyl — 10 jyl. Nebary úsh kún ishinde tanysyp, kezdesip, kóńil qosqan.
Taǵdyr aýyrtpalyǵyna moıymaǵan aqyn jubaıyn jolyqtyrǵan sátti erekshe tolǵanyspen eske alady.
— Qaryndasym Juldyzǵa «aǵańa qyz qarap júr, úılenetin kez keldi» deıtinmin. Bir kúni múmkindigi shekteýli jandar arasynda oblystyq jarys ótetin boldy. Soǵan bararda qaryndasym «aǵa, ózińiz de qur júrmeńiz» dep shyǵaryp saldy. Sodan ne kerek, bir oıym jarysta, bir oıyn qyz izdeýde. Ómirimde qyzdar kezdespedi emes, kezdesti. Biraq olardyń kózinen «erteńimiz qalaı bolady?» degen qorqynyshty kóretinmin. Alla osy joly qaryndasymnyń aýzyna ádeıi salǵan sııaqty. Oıyn aıaqtalyp, syrtqa shyqqanymda dálizde júrgen eki jas qyzǵa kózim tústi. Surastyra kele bilgenim, ekeýi de turmys qurmaǵan. Men de olarǵa qıyndyqpen qalaı kúresip kele jatqanymdy, kitap jazǵanymdy, adal ári qarapaıym qyz izdep júrgenimdi aıttym. Áńgimemdi Áıgerim muqııat tyńdap otyr eken. Jalt burylǵanymda ekeýmizdiń janarymyz túıisip, men izdegen qyz osy degen oı keldi. 2015 jyly Ramazan aıynda jeńgeńmen tanysyp, úshinshi kúni alyp qashtym, — deıdi Nurmuhamed Ábilqasymov.
Áıgerim tórkini qarsy bolýy múmkin ekenin oılap, jigit jaqtyń quda túsip kelýin qoshtamapty.
Bulardyń jarasymdy ómir súretinine senbegender kóp bolǵan. Alaıda ómir aǵymy múldem basqany kórsetti.
— Oblys ortalyǵyndaǵy jarysqa ol shahmat, men ústel tennısi sportynan qatystyq. Sol jerde bir-birimizdi unatyp qaldyq. Bizdi Alla qosty. Jar tańdaýda qatelespegenime qýanamyn. Nurekeń áıeldi syılaı biledi. Meni de, balalaryn da árkez qoldap otyrady. Ótirik sóılegendi, kólgirsigendi unatpaıdy, — deıdi aqynnyń jary.
Qyz alyp qashýdyń óz qyzyǵy bar. Qyzy úıine oralmaǵasyn anasy ýaıymdap polıtsııaǵa júgingen.
Áıgerimniń qaıda ekenin bilgennen keıin qyz jaq Nurmuhamedtiń aýylyna kelip, bul úıdegiler abyr-sabyr kúıge túsipti.
— Áıgerimniń óz erkimen kelgenin estigen soń ǵana qýǵynshylardyń kóńili ornyna tústi. Onyń anasyna «aýrýdy tilep ıa qoldan jasap alǵan joqpyn. Osy kúndi 37 jyl boıy kúttim. Qyzyńyzdy baqytty qylam dep aıta almaımyn. Biraq baqytty qylýǵa tyrysamyn» dedim. Óıtkeni múgedekter arbasyna tańylsam da bir otbasynyń jaǵdaıyn jasaı alatynyma senetinmin. Áıgerimniń anasyna bergen ýádemde turǵan sııaqtymyn, — deıdi Nurmuhamed Ábilqasymov.
Erli-zaıyptylardyń Qalqaman men Qaraqat esimdi egiz balalary bar. «Endigi jerde solardyń qyzyǵyn kórsem» deıdi aqyn keıipkerimiz.
Eske salsaq, elimizde 15 sáýir — ǵashyqtar kúni retinde atalyp ótip keledi. Ol 2011 jyly 14 aqpan — Áýlıe Valentın kúnine balama retinde paıda boldy.