Qyzylordalyq ata-analar ekpege nege qarsy

QYZYLORDA. KAZINFORM – Qyzylorda oblysynda tumaý men jedel respıratorly vırýstyń qarqyny báseńdedi. Bul týraly oblystyq densaýlyq saqtaý basqarmasynan habarlady.

Óńir halqy juqpaly aýrýlardyń shyrqaý sheginen ótken sııaqty.

— Kúni keshege deıin naýqastar palataǵa syımaı, dálizde jatqan jaǵdaılar boldy. 200 tósek oryndy oblystyq juqpaly aýrýlar aýrýhanasy 380 tósek orynǵa keńeıtilip, mamandar shekten tys júktememen jumys istedi. Naýqastardy qabyldaýǵa arnalǵan qosymsha ǵımarattar ashyldy. Búgingi kúni sol aýrýhanada 180 adam em qabyldap jatyr, — dedi basqarma basshysy Oljas Ysqaqov. 

Derttiń aldyn alýdaǵy negizgi qadam — vaktsınatsııa. Degenmen halyqtyń belgili bir bóliginiń birqatar ınfektsııaǵa qarsy ekpe sharalarymen tıisti deńgeıde qamtylmaýynan juqpaly aýrýlar órshı túsken. Ulttyq kúntizbege sáıkes, bala 1 jáne 6 jasynda qyzylshaǵa qarsy 2 týr vaktsına alýy qajet. Alaıda ata-analardyń ekpeden bas tartýy sebepti 2023 jyldan beri qyzylsha aýrýy tolassyz tirkelip otyr. Aýrý negizinen 5 jasqa tolmaǵan balalar arasynda, 77,2%-ynda dál osy ekpe almaǵandar arasynda tirkeletini anyqtaldy.

— Ata-analardyń balalaryna ekpe saldyrmaý sebebin dinı nanym-senimge tirep qoıýdan aýlaqpyz. Buǵan áleýmettik jeli arqyly jan-jaqtan alatyn aqparattyń áseri zor. Eń qıyny, ekpe alǵan balalarǵa almaǵan balalardyń kesiri tıip jatyr. Osy rette ata-analardy ekpe sharalaryna senim bildirip, balalardyń densaýlyǵyna jaýapkershilikpen qaraýǵa shaqyramyn, — dedi Oljas Ysqaqov.

Aıta ketsek, buǵan deıin biz Qazaqstanda vaktsına alýdan bas tartqandar sany 3,8 paıyzǵa óskenin jazǵanbyz.