Qyzylordada jastar arasyndaǵy jumyssyzdyq kórsetkishi tómendedi
QYZYLORDA. KAZINFORM — Qyzylordada jastar arasyndaǵy jumyssyzdyq kórsetkishi tómendedi.
Bul týraly Ortalyq kommýnıkatsııalar qyzmetiniń brıfınginde Qyzylorda oblysynyń ákimi Nurlybek Nálibaev baıandady.
Syr óńirinde Memleket basshysynyń 10 myń adamǵa 100 jumys ornyn qurý tapsyrmasynan týyndaǵan jospar 2022-2023 jyly 63 paıyzǵa artyǵymen oryndalyp, 25 myńǵa jýyq jańa jumys orny ashyldy.
Memleket basshysy bıylǵy Joldaýynda 2025 jyldy «Jumysshy mamandyqtar jyly» dep jarııalady. Osyǵan oraı, aımaqtyń eńbek naryǵyna qajetti kadrlar daıarlaý úshin Mamandyqtar atlasy ázirlenip, aýyl sharýashylyǵy, qyzmet kórsetý, taý-ken, tehnıkalyq-tehnologııalyq, IT salalaryna qajetti kadrlar daıarlanady.
«2024 jyldyń 10 aıynda 30 myńǵa jýyq jumys orny ashyldy. Bul jospar jyl aıaǵyna deıin tolyǵymen oryndalady. Jastar arasyndaǵy jumyssyzdyq kórsetkishi tómendedi», — dedi Nurlybek Nálibaev.
Aıta keteıik, Qazaqstan men Ońtústik Koreıa yntymaqtastyǵy aıasynda bıyl Qorqyt Ata atyndaǵy Qyzylorda ýnıversıtetiniń bazasynda elimizdegi alǵashqy jasandy ıntellekt ınstıtýty ashyldy.
«Onda kıberqaýipsizdik, ınformatıka jáne aqparattyq júıeler mamandary Seýl Ulttyq Ǵylym jáne tehnologııalar ýnıversıteti ázirlegen baǵdarlamalar boıynsha oqytylady», — dedi aımaq basshysy.
