Qyzylordada jarty ǵasyrdan beri kıiz úı tigetin otbasy turady
QYZYLORDA. KAZINFORM – Qyzylorda oblysynyń ortalyǵynda úsh býyndy almastyrǵan kıiz úı tigýli tur.
Áıtimovter áýleti úshin bul – teńdessiz qundylyq. Óıtkeni jeti qanatty aqboz úı osy otbasynyń aýlasynda jarty ǵasyrdan beri jarasym taýyp keledi.
– Ony ákem Kenjebaı Áıtimuly qaraqalpaq qolónershilerinen satyp alǵan eken. Úıge ákelip túsirgeni, alǵash ret qurǵany, aǵa-apalarymnyń jappaı kómekteskeni áli kóz aldymda. Biz keshege deıin Jalaǵash aýdanynyń Aqaryq aýylynda turdyq. 1975 jyly 1 qyrkúıek kúni birinshi synypqa osy kıiz úıden shyqqanmyn. Eki jyl buryn Qyzylorda qalasyna qonys aýdardyq. Kıiz úıdi ózimizben birge ala keldik. Jylda mamyr aıynan bastap quratynbyz. Bıyl balalar «Naýryzdy kıiz úıde qarsy alaıyqshy» degesin kóktem shyǵysymen ornatyp qoıdyq, – dedi Nursultan Áıtimov
Keıipkerimiz áke-sheshesi ómirden ótip ketse de ekeýiniń amanatyna syzat túsirmeı keledi.
– Ákemniń dúnıeden óter aldynda aıtqan bir aýyz sózi sanamnan óshken joq. «Bilegimniń kúshi qaıtqansha osy qarashańyraqty qaıda júrsem de tigýdi ózime mindet etip alǵanmyn. Qoǵam bulaı tura bermeıdi, bári ózgeredi, aqsha aýysady, sol kezde taryqtym dep satyp jibermeı, endigi jerde óziń ege bol» dep tapsyrǵan edi. Ras, satýymdy ótingender boldy. Biraq bul – ákemniń amanaty, odan attap kete almaımyn, – dedi ol.
Kıiz úıdiń dıametri – 6,5 metr, bıiktigi – 4,20 metr. Keıbir jabdyǵyn Nursultan aǵanyń anasy Farıda Raıymqulqyzy toqyǵan.
– Ony qurýdyń ózi – biz úshin kishigirim toı. Quratyn kezde aǵa-jeńgelerim, uldarym men kelinderim, nemerelerim jınalyp asarlatady. Áke-sheshem bar kezdegi balalyq, jastyq shaǵym esime túsip, kóńilim marqaıyp qalady. Kıiz úıdiń aýasy bólek qoı, shirkin! Janǵa jaıly, sap-salqyn, – dedi Nursultan Áıtimov.
Tarıhı kıiz úı kóktemnen qara kúz túskenshe, qazan aıyna deıin qurylyp turady.
Aıta keteıik, Naýryz meıramyna oraı Pavlodar oblysynda 151 kıiz úı tigiledi.