Qyzylordada jaqsy jaǵdaıdaǵy joldar úlesi 95% asty
ASTANA. KAZINFORM — Qyzylorda oblysynda 2022-2025 jyldary 1600 shaqyrym avtojoldar men 30 kópir ótkelin salýǵa, kúrdeli jóndeýden ótkizýge 150 mlrd teńgeden astam qarjy bólindi. Jaqsy jaǵdaıdaǵy joldardyń úlesi 95%-dan asty. Bul týraly óńir ákimi Nurlybek Nálibaev aıtyp berdi.
Ákimniń aıtýynsha, bıyl jol ınfraqurylymyn damytýǵa bıýdjetten 50 mlrd 605 mln teńge bólinip, 329 shaqyrym avtomobıl joldary, kósheler men kópir ótkelderi jóndeýden ótti. Qyzylorda qalasyndaǵy 270 kóshe qaıta jańǵyrtyldy.
— Jaqsy jaǵdaıdaǵy joldardyń úlesi 95 paıyzǵa jetti. Jaqynda ǵana Qyzylorda-Jezqazǵan avtomobıl jolynyń oblys aýmaǵyndaǵy 216 shaqyrymy qaıta jańǵyrtýdan ótip, el ıgiligine berildi. Aral qalasynda 3 mlrd 140 mln teńgege 940 metr aspaly kópir salyndy, — dedi N. Nálibaev elordada Ortalyq kommýnıkatsııalar qyzmetinde.
Sonymen birge, 1 mlrd 400 mln teńgege turǵyndar uzaq jyl kútken Jańaqorǵan kentindegi temir jol ústinen ótetin kópir paıdalanýǵa berildi.
Taǵy 4 mlrd 700 mln teńgege Qyzylorda qalasyndaǵy temirjol asty avtojol qurylysy qarqyndy júrip jatyr. Jol aldaǵy naýryz aıynda paıdalanýǵa beriledi.
Al Qarmaqshy aýdanynda 5 mlrd 515 mln teńgege temir jol arqyly ótetin kópirdiń qurylysy bastalady.
— Memleket basshysynyń tapsyrmasyna sáıkes, Qyzylorda qalasynan Aqtóbe oblysy baǵytyndaǵy avtomobıl jolyn 4 jolaqtyǵa aýystyrý boıynsha demeýshiler esebinen 350 mln teńgege joba ázirlendi. Qala mańyndaǵy aınalma jol salý jumystary aldaǵy qańtar aıynda bastalady. Ekinshi bóligi – Aqtóbe shekarasyna deıingi 462 shaqyrymnyń tehnıkalyq ekonomıkalyq negizdemesi ázirlendi. Joba quny – 832 mlrd 812 mln teńge, — deıdi oblys ákimi.
Prezıdent bıylǵy Joldaýynda «Sekseýil-Beıneý» avtomobıl jolynyń qurylysyn jedeldetýdi tapsyrǵan bolatyn. Avtojoldyń jalpy uzyndyǵy 559 shaqyrymdy quraıdy. Onyń 189 shaqyrymy Aral aýdanynyń birqatar aýyldary arqyly ótetindikten oblystyń eń shalǵaı eldi mekenderiniń jol qatynasy jaqsarady.
Buǵan deıin Nurlybek Nálibaev Syr dıqandary da sý tapshylyǵyn sezingenin, endi sý únemdeý tehnologııalaryn belsendi qoldana bastaǵanyn aıtqan edi.