Qyzylordada sý únemdeý arqyly kúrish ónimdiligi 30%-ǵa kóterildi

QYZYLORDA. KAZINFORM – Qyzylorda oblysynda kóktemgi dala jumystaryn qarjylandyrýǵa 40 mlrd teńge jumsalady. 

Aımaqta «aq egis» áldaqashan bastalyp ketti. Osy kúnge deıin josparlanǵan jońyshqa egistiginiń 42%-y, maqsarynyń 38%-y, bıdaıdyń 77%-y, arpanyń 25%-y, jáne qant qumaıy egistiginiń 9%-y egildi. Al sáýir aıynyń úshinshi onkúndiginde kúrish egý jumysy bastalady.

– Dıqandar sońǵy 10 jyldan beri 55 myń gektar kúrish atyzyna lazerlik tegisteý jumystaryn júrgizdi. Osylaısha sýdy únemdeý arqyly ónimdilik kórsetkishin 30%-ǵa deıin kóterýge bolatynyn dáleldedi. Bıyl ony 60 myń gektarǵa jetkizý josparlanyp otyr, - dedi oblystyq aýyl sharýashylyǵy jáne jer qatynastary basqarmasynyń basshysy Talǵat Dúısebaev. 

Basqarma basshysynyń aıtýynsha, erteń Ózbekstanda ótetin memleketaralyq sý sharýashylyǵyn úılestirý komıssııasynyń kezekti otyrysynda vegetatsııa kezeńine sý lımıti belgilenedi. Egis kólemi soǵan qaraı naqtylanady. 

Ótken jyly óńirde aýyl sharýashylyǵy qurylymdary quny 8,8 mlrd teńge bolatyn 250 tehnıka satyp aldy. Sondaı-aq mashına-traktor parki jańartyldy.