Qyzylordada sıntetıkalyq esirtki jarnamalaǵan 1500 ınternet-saıt buǵattaldy

QYZYLORDA. KAZINFORM – Qyzylorda oblystyq polıtsııa departamentiniń qyzmetkerleri ótken jyly esirtkiniń zańsyz aınalymyna qarsy júrgizilgen is-sharalar nátıjesinde 304 quqyqbuzýshylyqty anyqtady.

Departamenttiń baspasóz qyzmeti habarlaǵandaı, zańsyz aınalymnan 1 tonna 883 kılogramm esirtki zaty tárkilendi. 

- Onyń ishinde 220 kılogramm marıhýana, 687 gramm gashısh, 1 tonna 650 kılogramm sora ósimdigi, 9 kılogramm kóknár ósimdigi jáne 2 kılogramm 666 gramm sıntetıkalyq esirtki zaty bar. Sonymen qatar úı jaǵdaıynda sora ósimdigin zańsyz ósirgen 5 fıtozerthana anyqtaldy. Asa iri mólsherde mefedron jáne a-PVP sıntetıkalyq esirtki zatyn tasymaldaǵany úshin kúdikti retinde Qyzylorda, Mańǵystaý oblystarynyń turǵyndary ustaldy, - delingen habarlamada. 

Esirtkini zańsyz jarnamalaý boıynsha ekinshi deńgeıli bankterdiń 1100 esepshoty «Antıfrod» júıesi arqyly buǵattaldy. Sıntetıkalyq esirtkini jarnamalaǵan 1500 ınternet-saıt «Kıberqadaǵalaý» aqparattyq júıesine engizilip, buǵattaldy.

Eske salsaq, Qyzylorda oblysynda ótken jyly polıtsııanyń 102 arnasyna 71 293 habarlama túsken.