Qyzylordada «Shahmat kerýeni» saıysynyń jeńimpazdary anyqtaldy
Elimizdiń barlyq aımaǵyn aralaǵan «Shahmat kerýeni» Qyzylorda qalasyna kelip, jergilikti turǵyndar arasynda saıystar ótkizildi, dep habarlaıdy Kazinform.
Osyǵan oraı ortalyq alańda bolǵan saltanatty shara oblys ákiminiń orynbasary Meırambek Shermaǵanbet quttyqtaý sózimen bastaldy.
«Alty Alashqa ana bolǵan Syr óńirine «Shahmat kerýeni» kelip jatyr. Bul – biz úshin mańyzdy oqıǵa. Óıtkeni oblysymyzda shahmattan úlken jetistikterge jetip júrgen sportshylarymyz barshylyq. Olardyń qatarynda 12 dúrkin Qazaqstan chempıony, úsh dúrkin álem, jeti dúrkin Azııa chempıony, oblys tarıhyndaǵy tuńǵysh FIDE sheberi Ásel Serikbaı men toǵyz dúrkin Qazaqstan chempıony, oqýshylar arasynda álem, Azııa chempıony Nazerke Nurǵalı sııaqty maqtanyshtarymyz bar. Áli de ortamyzdan bolashaq grossmeısterler shyǵatynyna senimdimin», – dedi Meırambek Zınabdınuly.
Oblysta 14 175 adam, onyń ishinde 7 189 aýyl turǵyny shahmatpen aınalyssa, óńirdegi jas zııatkerlerge 365 jattyqtyrýshy sabaq beredi.
Shara kezinde shahmat federatsııasynyń oblystyq fılıaly ashylyp, onyń tóraǵalyǵyna jeke kásipker Asqar Mahambetov taǵaıyndaldy. Federatsııanyń vıtse-prezıdenti Marat Esenov aımaqtaǵy fılıaldyń ashylýy shahmat sportyndaǵy jetistikterdi kóbeıtýge múmkindik beretindigin jetkizdi.
Qazirdiń ózinde júzege asyp jatqan kóptegen bastama bar. «Mekteptegi shahmat» pılottyq jobasy aıasynda Qyzylorda oblysyndaǵy 5 mekteptiń oqýshylary ıntellektýaldy oıynmen kásibı túrde shuǵyldanyp jatyr.
Alańda tigilgen mobıldi kıiz úıde shveıtsarlyq júıe boıynsha 11 kezeńnen turatyn blıtsten týrnır bolyp, 20 adamnyń ishinen úsh jeńimpaz grand-fınalǵa joldama aldy. Olar:
І oryn – Ernur Erjanuly (11 upaıdan 10);
ІІ oryn – Ádilet Erserik (9 upaı);
ІІІ oryn – Nursát Ospan (8 upaı).
Bir qyzyǵy, І jáne ІІІ oryn jeńimpazdary bir úıdiń balalary bolsa, ekinshi oryn ıelengen júldeger – osy jeńimpazdardyń jattyqtyrýshysy.
Marapattaýdan keıin kerýenniń qurmetti qonaǵy, halyqaralyq deńgeıdegi shahmat sheberi Ásel Serikbaı bir mezettik oıyn seansyn ótkizdi. Seansqa aldyn-ala tirkelgen 10 áýesqoı shahmatshy qatysty. Burynnan da Qyzylorda qalasyndaǵy mektepterde bir mezettik oıyndardy uıymdastyryp júrgen Ásel «Shahmat kerýeni» aıasyndaǵy seansqa týǵan jerinde alǵash ret qatysty.
Aıta ketsek, Qazaqstan shahmat federatsııasynyń aımaqtardaǵy ıntellektýaldy sport túrin damytý úshin qolǵa alǵan jobasyna Freedom Broker kompanııasy bas demeýshilik jasap otyr.
