Qyzylordada salmaǵy 6,5 keli alyp bala dúnıege keldi

QYZYLORDA. KAZINFORM – Kópbeıindi Qyzylorda oblystyq aýrýhanasynda Qarmaqshy aýdanynyń turǵyny Saltanat Uzaqbaı salmaǵy 6 keli 500 gramm bolatyn náresteni dúnıege ákeldi. Bul týraly aýrýhananyń baspasóz qyzmeti habarlady.

Áıelge akýsherlik bólim meńgerýshisi Arman Erjanova men akýsher-gınekolog Fatıma Qosnazarova josparly ota jasady.

- Alyp balanyń týǵan kezde jaǵdaıy aýyr bolǵan. Náresteniń densaýlyǵyn turaqtandyrý úshin jańa týǵan nárestelerdiń reanımatsııa jáne patologııa bólimshesinde qosymsha em qabyldaǵan. Qazir náreste men anasynyń densaýlyǵy turaqty. Sábı ana sútimen qorektenip jatyr. Alyp balaǵa atasy Qýanyshbek dep esim beripti. Jaqyn kúnderi ol úıine shyǵarylady, - delingen habarlamada.

Aıta keteıik, aýrýhanada ótken jyldyń naýryz aıynda 70 oryndyq perınataldyq bólim ashyldy. Buǵan deıin Qyzylordada bosanǵan áıelder men jańa týǵan nárestelerge kómek kórsetetin jalǵyz medıtsınalyq uıym oblystyq perınataldyq ortalyq qana bolǵan. Atalǵan bólim perınataldyq ortalyqtyń júktemesin azaıtty. Akýsherlik bólimde túrli syrqaty bar júkti áıelderge kómek kórsetiledi.

Al keshe osy aýrýhanada Hadııa, Hafız, Hamza esimdi úshem dúnıege kelgenin habarlaǵanbyz.