Qyzylordada Sabantoı merekesi ótti
QYZYLORDA. KAZINFORM – Qyzylordada oblystyq tatar etnomádenı birlestigi jıyrmasynshy ret Sabantoıdy toılady. Bul týraly oblystyq Qazaqstan halqy assambleıasy habarlady.
Oblystyq qoǵamdyq damý basqarmasynyń basshysy Rýslan Kaıýpov bul yntymaq pen birlik meıramy ekenin atap ótti.
— Osyndaı jarqyn merekege birge kýá bolý, biz úshin úlken qýanysh. Barshańyzǵa amandyq, eńbekterińizge tabys, shańyraqtaryńyzǵa shattyq tileımin. Sabantoı qutty bolsyn, — dedi ol.
Etnomádenı birlestik tóraǵasy Galııa Gızatýllına Sabantoı eńbek merekesi ǵana emes, ulttyń rýhanı bolmysyn, baı mádenıetin, tatýlyq pen ózara syılastyqty pash etetin erekshe kún ekenin jetkizdi.
Merekelik dýmanda ónerpazdar tatardyń ulttyq áni men bıin kópshilik nazaryna usyndy.
«Sarman» vokal toby, «Jasmın» bıshiler toby, sondaı-aq Tatarstannan arnaıy kelgen qonaqtar Ilnýr Enıkeev pen Alına Ahmetshına óz ónerimen kórermenderdi tánti etti. Halyq oıyndary men sporttyq jarystar uıymdastyryldy.
Aıta keteıik, Qyzylordada etnomádenı uıymnyń onkúndigi ótip jatyr. Onkúndik aıasynda buǵan deıin alǵash ret «Taqııadaǵy júgiris» saıysy ótti. Qatysýshylar tatardyń ulttyq bas kıimi — taqııany kıip, 500 metrden 1000 shaqyrymǵa deıingi aralyqqa júgirdi.
Eske salsaq, bıyl Qazaqstan halqy Assambleıasynyń 30 jyldyǵy.