Qyzylordada «Naýryz- bereke bastaýy» atty merekelik shara ótti
QYZYLORDA. KAZINFORM – Syr elinde Ulystyń uly kúni keń kólemde toılanýda. Aımaqtyń ár aýdany men aýyldarynda kıiz úıler tigilip, turǵyndar úshin merekelik kontsertter uıymdastyryldy.
Búgin Qyzylorda qalasynda oblys ákimi Nurlybek Nálibaevtyń qatysýymen «Naýryz - bereke bastaýy» atty merekelik shara ótti. Merekege arnalyp «Rýhanııat aýyly», «Ustazdar aýyly», «Ardagerler aýyly», «Aqyndar aýyly» «Densaýlyq aýyly», «Yntymaq aýyly», «Eńbekshiler aýyly», «Kásipkerler aýyly», «Qurylysshylar aýyly» dep atalatyn kıiz úıler tigildi. Kıiz úılerde jarapazan aıtyldy, qyz ben jigit aıtysyp, qazanjappaı jabyldy. Ulttyq sport saıystary, qolónershiler festıvali ótip, teatrlandyrylǵan qoıylym qoıyldy. Qazaqtyń dástúrli «Syrǵa salý» rásimi kórsetilip, ata-ájeler ansambli halyq ánderin shyrqady.
Oblys ákimi men el aǵalary kishkentaı búldirshinderdiń tusaýyn kesip, alǵashqy qadamdaryna aq batasyn berdi. Jańadan boı kótergen “Óner ortalyǵynyń” aldynda ulttyq kıimdegi ónerpazdar sherýi ótti. Aımaq basshysy jınalǵan qaýymdy Naýryz meıramymen quttyqtap, oblys kóleminde atqarylǵan jumystarǵa toqtaldy, jetistikterdi atap ótti.
«Sizderdi Áz-Naýryz meıramymen shyn júrekten quttyqtaımyn! Búginde Ulystyń uly kúni Qazaqstan halqyna ortaq búkilhalyqtyq merekege aınaldy. Syr eli Naýryz merekesine Memleket basshysynyń jáne Úkimettiń qamqorlyǵy men qoldaýynyń arqasynda tolymdy tabystarmen jetti. Tamyry tereń, tarıhy kenen Alashtyń anasy - qasıetti Syr óńirinde sońǵy jyldary maqsatty bastamalar qolǵa alynyp, aımaǵymyz qarqyndy damý jolyna tústi. Qańtar-aqpan aılaryndaǵy áleýmettik-ekonomıkalyq damý kórsetkishteri boıynsha óńirler arasynda alǵashqy oryndy ıelendik. Bıylǵy bıýdjetimiz 650 mlrd teńge bolyp bekitildi. Bul aýqymdy qarajat halyqtyń eń ózekti degen máselelerin sheshýge, ómir súrý sapasyn arttyrýǵa baǵyttalýda. Syrboıylyqtardyń 98,4 paıyzy ortalyqtandyrylǵan aýyz sýmen qamtylǵan. Bıyl osy baǵytta 14 joba júzege asyrylady. Óńirimiz kún sanap kórkeıip, qala men aýyldardyń ajaryn aıshyqtaıtyn záýlim ǵımarattar, turǵyn úıler boı kóterýde. Aldymyzda aıqyn mindetter, olardy júzege asyrýǵa qurylǵan júıeli josparymyz bar. Halyqtyń ıgiligi, turǵyndardyń jaıly turmys-tirshiligi úshin aýqymdy jobalardy ózderińizben birge jasaımyz. Ulttyq qundylyqtarymyzdy ulyqtaǵan Naýryz meıramy Táýelsiz elimizge, týǵan jerimizge, árbir otbasyna yrys-qut, molshylyq pen toqshylyq ákelsin!», - dedi Nurlybek Nálibaev.
Aımaqta halyqtyń turmys-tirshiligin jaqsartý, ınfroqurylymdy damytý maqsatynda keń kólemdi jobalar júzege asyrylýda. Oblys boıynsha 225 shaqyrym elektr jelisi men 50 qosalqy stantsııa ornatylady dep josparlanýda. Oǵan qosa 247 shaqyrym joldar jóndeýden ótip, jyl sońyna deıin jaqsy jaǵdaıdaǵy joldardyń úlesi 90 paıyzdan asady. Bıyl 1890 páterlik 70 turǵyn úı (aýdandarda - 346, Qyzylorda qalasynda - 544 páter) salynady. Mereke qarsańynda 220-ǵa jýyq otbasy jańa baspanaǵa ıe boldy. Jaqyn kúnderi Qyzylorda qalasynyń sol jaǵalaýyndaǵy zamanaýı úlgidegi avtovokzal paıdalanýǵa beriledi. Búginde 300 oryndyq jataqhanasy bar 400 oryndyq fızıka-matematıka mektep-ınternatynyń qurylysy qarqyn aldy. «Jaıly mektep» ulttyq jobasy aıasynda óńirde bıyl 10 mektep el ıgiligine tabystalady. Taǵy 11 mekteptiń qurylysy bastalady. Oblys ortalyǵynda «Shyǵarmashylyq akademııasy», eki aýdanda Oqýshylar úıi men Óner mektepteriniń qurylysy júrgiziledi dep kútilýde.
Demeýshilerdiń qoldaýymen de óńirde 37 mlrd 600 mln. teńgeniń aýqymdy jobalary iske asýda. Qorqyt ata áýejaıynyń jańa termınaly jaqynda paıdalanýǵa beriledi. «QazGerMunaı» kompanııasynyń 350 oryndyq zamanaýı úlgidegi Oqýshylar saraıynyń qurylysy qarqyndy júrýde. «Saýts Oıl» kompanııasynyń demeýshiligimen 650 oryndyq zamanaýı úlgidegi jańa mýzykalyq kolledj qurylysy bastaldy.
Naýryz meıramyna arnalǵan merekelik shara QR Eńbek sińirgen ártisi Kúlán Qalymbetova, estrada ánshileri Janbolat pen Jazıra, Aıgúl Qosanova jáne Syr ónerpazdarynyń qatysýymen uıymdastyrylǵan kontsertke ulasty.
