Qyzylordada nan ónimderi kesheni iske qosyldy
QYZYLORDA. KAZINFORM - Búgin «Qyzylorda-Nan» seriktestigi nan ónimderin shyǵarý kesheniniń ashylý rásimi ótti. Saltanatty sharaǵa zııaly qaýym ókilderi, el aǵalary, qala turǵyndary qatysty.
Aımaq basshysy Nurlybek Nálibaev óńirde júzege asyrylǵan iri ınvestıtsııalyq jobalardy atap ótip, jınalǵan qaýymdy jańa nysannyń ashylýymen quttyqtady.
«Prezıdentimiz Qasym-Jomart Kemeluly: «Ekonomıkany ártaraptandyrýdy tyń qarqynmen jalǵastyrý kerek. Іshki jáne syrtqy naryqta básekege qabiletti, tereń óńdelgen ónim shyǵarýǵa basymdyq berilýge tıis», – degen bolatyn.
Óńirimizde qolaıly ınvestıtsııalyq klımat qalyptasyp, aýqymdy jobalar júzege asyrylyp jatyr. 2022-2024 jyldary aımaq ekonomıkasyna 1 trıllıon 600 mlrd. teńgege jýyq ınvestıtsııa tartyldy.
Bıyl 631 mlrd. 400 mln. teńgeden astam ınvestıtsııa tartý baǵytynda jumys júrgizilip jatyr. Ótken 8 aıda 408 mlrd. 200 mln. teńge ınvestıtsııa tartylyp, jospardyń oryndalýy boıynsha Qyzylorda oblysy respýblıkada birinshi orynǵa shyqty. Jyl sońyna deıin jańa jobalardy iske qosý esebinen jospar 716 mlrd. teńgege deıin artyǵymen oryndalady. Tikeleı sheteldik ınvestıtsııa tartý boıynsha 280 mln. AQSh dollary bekitilgen, osy jyldyń ІІ toqsanynda 172,9 mln. AQSh dollary tartylyp, jospar 62%-ǵa oryndaldy.
-Búgin óńir ekonomıkasyna tyń serpin beretin «Qyzylorda-Nan» seriktestiginiń nan ónimderi kesheniniń ashylý saltanatynda bas qostyq. Barshańyzdy jańa kásiporynnyń iske qosylýymen shyn júrekten quttyqtaımyn. Jobaǵa atsalysqan ınvestorlarǵa, qurylysshylarǵa, barlyq seriktes uıymdarǵa alǵysymyzdy bildiremiz. Keshenniń jumysy tabysty, óndirisi berekeli bolsyn! Egemen elimizdiń eńsesi bıik, Táýelsizdigimiz tuǵyrly bolǵaı!», – dedi Nurlybek Mashbekuly.
Rásimde oblystyq ardagerler keńesiniń tóraǵasy Serik Dúısenbaev quttyqtaý sóz sóıledi. Aımaqtyń áleýmettik-ekonomıkalyq damýyna sińirgen eńbegi, óńdeý ónerkásibi salasyna aýqymdy ınvestıtsııa salǵany úshin metsenat Neılıa Júsipova Qyzylorda oblysynyń Qurmet gramotasymen marapattaldy. Qyzmetkerlerge oblys ákiminiń Alǵys haty tabystaldy.
Qyzylordada alǵash ret 1957 jyly iske qosylǵan nan zaýyty 1995 jylǵa deıin turǵyndardy sapaly ónimmen qamtamasyz etken bolatyn. Araǵa otyz jyl salyp, bul ıgi dástúr jalǵasyn taýyp, jańa keshen jumysyn bastady.
Jalpy 5,6 mıllıard teńge qarjy jumsalǵan bul keshen – tek óndiristik qana emes, áleýmettik jáne ulttyq mańyzǵa ıe iri nysan. Búginde munda 120 adam eńbek etip jatyr, aldaǵy ýaqytta jumys oryndarynyń sany 170-ke deıin kóbeıedi.
Keshenge memlekettik qoldaý retinde 5 gektar jer telimi bólinip, qajetti ınfraqurylymmen qamtamasyz etildi. Sonymen qatar, 1,2 mıllıard teńge jeńildetilgen nesıe berilip, onyń paıyzdyq mólsherlemesi sýbsıdııalandy. Birinshi kezeńde 3,1 mıllıard teńgege zamanaýı, tolyq avtomattandyrylǵan jabdyqtary bar tórt óndiristik tseh iske qosyldy. Aldaǵy jyly jobanyń ekinshi kezeńinde 2,5 mıllıard teńgege un kombınatyn salý josparlanǵan.
