Qyzylordada kúrishtiń kóp ónim beretin jańa sorttary shyǵady

Qyzylordada bıyl 503 myń tonna kúrish jınaldy. Sý tapshylyǵyna qaramastan kúrish ónimdiligi ótken jylmen birdeı boldy. Bul týraly oblys ákimi Nurlybek Nálibaev elordada eseptik kezdesýinde aıtty, dep habarlaıdy Kazinform.

«Egin naýqanynyń qorytyndysymen ár gektardan 56,5 tsentnerden ónim alynyp, qambaǵa 503 myń tonna kúrish jınaldy. Sý tapshylyǵyna qaramastan kúrish ónimdiligi ótken jylmen birdeı boldy. Oblystyń aýyl sharýashylyǵy salasyndaǵy eksporttyq áleýeti artyp, ótkizý naryǵy keńeıýde. Sońǵy 2 jylda quny 84 mln AQSh dollary bolatyn aýyl sharýashylyǵy ónimderi eksporttaldy. Eksporttalǵan ónimniń 96% óńdelgen», - dedi Nurlybek Nálibaev Ortalyq kommýnıkatsııalar qyzmetinde ótken baspasóz máslıhatynda.

Onyń aıtýynsha, sýdy únemdi paıdalaný úshin tamshylatyp, jańbyrlatyp sýarý ádisteriniń qoldaný aıasy keńeıtilmek. Osy jyly sý únemdeý tehnologııasyn paıdalaný arqyly 872 gektarǵa aýyl sharýashylyǵy daqyldary egildi. Bul úrdisti jyl saıyn arttyrý kózdelgen.

«Aımaqta kúrishtiń, ózge de daqyldardyń jańa sorttaryn shyǵaryp, ónim sapasyn arttyrý úshin Ybyraı Jaqaev atyndaǵy qazaq kúrish sharýashylyǵy ǵylymı zertteý ınstıtýtynyń qyzmetine basymdyq beriledi. Jaqynda Aýyl sharýashylyǵy ǵylym akademııasymen agroónerkásiptik keshendi ǵylymı jáne ınnovatsııalyq damytý salasyndaǵy yntymaqtastyq kelisimine qol qoıyldy. Ónimdiligi joǵary, ósý merzimi qysqa kúrishtiń jańa sorttaryn óndiriske engizýdemiz. Ǵalymdar birneshe jańa sorttardy synaqtan ótkizip jatyr. Bıylǵy nátıje jaqsy. Pılottyq jobadaǵy sorttar 10 tsentnerden joǵary ónim berip, 10-15 kún erte pisti. Kelesi jyly da osy kórsetkish saqtalsa, 2025 jyldan bastap jańa sorttar qoldanysqa enedi»,- dedi óńir ákimi.

Oblysta egis alqabyn ártaraptandyrý jumystary da jalǵasýda. Sýdy az qajet etetin daqyldardy egýdi kóbeıtemiz, maıly daqyldar alqaby 13%, mal azyǵy daqyldary – 8%, kartop, kókónis, baqsha daqyldary alqaby – 0,5%, basqa daqyldar egisi - 21% artady.