Qyzylordada kúrish kólemi qysqarady

QYZYLORDA. KAZINFORM — Bıyl Qyzylorda oblysynda 193,7 myń gektar jerge aýyl sharýashylyǵy daqyldary egiledi.

Oblystyq aýyl sharýashylyǵy jáne jer qatynastary basqarmasynyń málimetine súıensek, dándi daqyldar kólemi — 92,1 myń gektar, maıly daqyldar — 5,5 myń gektar, mal azyǵy — 78,6 myń gektar, kartop, kókónis, baqsha — 17,5 myń gektar. 

— Jyl basynda ǵylymı negizdelgen aýyspaly egis tártibine sáıkes sýarmaly sýdyń jaǵdaıyna baılanysty 85,9 myń gektar jerge kúrish daqylyn egý josparlanǵan bolatyn. Degenmen, búgingi kúngi sý kóleminiń tómendeýine jáne Úkimet bekitken jol kartasyna baılanysty kúrish kólemin 80,9 myń gektarǵa qysqartý qajet bolyp otyr, — dedi basqarma basshysy Talǵat Dúısebaev.

Kóktemgi egiske oblys boıynsha 22230 tonna kúrish tuqymy quıyldy. Onyń basym bóligi — «Lıder», «ıAntar», «Marshal» sorttary.

Aıta keteıik, bıyl kúrish egý barysynda tyń tehnologııalar, onyń ishinde agrodrondar qoldanylady. Bul pestıtsıdter, tyńaıtqyshtar men gerbıtsıdter shyǵynyn aıtarlyqtaı azaıtýǵa múmkindik beredi.