Qyzylordada qulaǵy tesilgen naýqasqa alǵash ret ota jasaldy

QYZYLORDA. KAZINFORM – Qyzylorda oblysy boıynsha alǵash ret tımpanoplastıka otasy 7 jastaǵy qyz balaǵa jasaldy.

Ota oblystyq kópbeıindi balalar aýrýhanasynda uıymdastyrylyp, shamamen 2,5 saǵatqa sozyldy. Oǵan otorınolarıngolog dáriger Aıbol Qonysbaev, anestezıolog Abzal Mamytbekuly jáne meıirbıke Janat Jalǵasbaı qatysty.

Qyz balany uzaq jyl boıy qulaǵynan iriń aǵý jaǵdaıy mazalap kelgen.

– Kishkentaı patsınetimiz bir jylda atıt dıagnozymen aýrýhanaǵa tórt ret jatyp shyqty. Ata-anasy ony basqa óńirge aparýǵa múmkindigi joq ekenin aıtyp, bizge senim artty. Sondyqtan qala emhanalarynyń birindegi apparatty alyp, alǵash ret ota jasaýǵa bekindik. Ota barysynda Astanada oqyp, jumys istegen ýaqyttaǵy tájirıbeme súıendim. Sondaı-aq elordadaǵy professorlardyń keńesine júgindim. Abyroı bolǵanda bastama sátti ótti, - dedi Aıbol Qonysbaev.

Tekserý kezinde naýqastyń qulaq jarǵaǵy tesilgeni anyqtalyp, oǵan jańadan jarǵaq, ıaǵnı perde salýǵa týra keldi. Dáriger mundaı dıagnozben tirkelgen adamdar óńirde jıi kezdesetinin aıtty.

– Bala tumaýratqanda tamaǵy irińdep, asqyný saldary qulaqqa ótedi. Sonyń kesirinen qulaqta aqaý paıda bolyp, perdesi tesiledi. Ókinishke qaraı mundaı aýrý jas talǵamaıdy. Degenmen balalarda kóbirek kezdesedi. Qyzylordada ota jasalmaǵasyn Almaty, Astana sııaqty megapolısterge barýǵa týra keletin. Soǵan shamasy kelmeı, aýrý asqynǵasyn apparatqa tańylatyn adamdar az emes, - dedi ol.

Buǵan deıin biz Qyzylorda qalasynda tize jáne jambas býyndaryn almastyrý boıynsha patsıentter MÁMS júıesi aıasynda hırýrgııalyq aralasýdan bastap medıtsınalyq ońaltýǵa deıingi em-domdy tegin ala alatynyn jazǵan edik.