Qyzylordada QAJD bastyǵy sýǵa batqan balany qutqaryp qaldy

QYZYLORDA. KAZINFORM - Qyzylorda oblystyq Qylmystyq atqarý júıesi departamentiniń bastyǵy basseınde sýǵa batqan balany qutqaryp qaldy.

Oblystyq QAJD bastyǵy Shaımerden Esenkeldıev demalys ornyna otbasymen barǵan. Qaıtýǵa jınalyp jatqanda sol aýmaqta áıel kisiniń basseınnen shyǵa almaı qalǵan balany qutqarýdy suraǵan aıqaılaǵan daýysyn estıdi. Ol birden sýǵa sekirip, balany syrtqa aman alyp shyqqan.

«Bar oıym basseınnen balany aman-esen alyp shyǵý boldy. Qutqarylǵan bala demala almaı jatty. Jedel járdem kelem degenshe jasandy tynys alý jattyǵýyn jasap, alǵashqy medıtsınalyq kómek kórsettim. Sodan soń esin jıǵan jasóspirimdi jedel járdem qyzmetkerleri oblystyq balalar aýrýhanasyna alyp ketti. Atalǵan áreketimdi erlik dep sanamaımyn. Ózim de ákemin, 8 balam bar. Bul balany toǵyzynshy balam dep esepteımin», - deıdi Sh. Esenkeldıev.

Sh. Esenkeldıev 2020 jyldyń sáýirinen beri Qyzylorda oblysy boıynsha Qylmystyq-atqarý júıesi departamenti bastyǵy qyzmetin atqaryp keledi.

Eske salsaq, budan buryn Qyzylordada órtten bir adamdy kúıik shalyp, 35 adam evakýatsııalandy.