Qyzylordada esirtki qylmysyna qatysty 22 adam ustaldy

QYZYLORDA. KAZINFORM — Bıyl 5 aıda Qyzylorda oblysynda esirtkige qatysty qylmys sany 11%-ǵa (93-ten 101-ge) kóbeıgen. Bul týraly oblystyq prokýratýradan habarlady. 

Mamandar qylmyskerlerdiń transformatsııalanyp, esirtki men psıhotroptyq zattardy ótkizýdiń jańa ádisine kóshkenin aıtyp otyr. Olar da ınternetti esirtki satatyn negizgi alańǵa aınaldyryp alǵan.

— Geroınniń ornyn sıntetıkalyq esirtkiler basty. Olardyń quramdas bólikteri erkin saýdada. Hımııalyq komponentter men prekýrsorlardyń zańdy aınalymyn baqylaý úshin tıimdi quraldardy engizý qajet. Qazirgi tańda zańsyz aınalymdy shekteıtin jańadan zań normalary ázirlenip jatyr, — dedi oblys prokýrorynyń orynbasary Nurbolat Dúısenbaev.

Bıyl esirtkini jarnamalaýǵa qatysty tirkelgen ister boıynsha 436 esepshottaǵy 64 mln teńge buǵattaldy. Marıhýananyń gollandııalyq túrin ósirýmen aınalysqan uıymdasqan qylmystyq top ustaldy.

— Tergeý barysynda 3 esirtki alqaby joıylyp, salmaǵy 1,5 tonnadan astam esirtki zaty alyndy. Qylmystyq toptyń 22 belsendi múshesi qamaýǵa alyndy. Qylmystyq isti qazir sot qarap jatyr, — dedi Nurbolat Dúısenbaev.

Al jýyrda Qyzylorda oblystyq prokýratýrasy jetim jəne ata-anasynyń qamqorlyǵynsyz qalǵan balalardy turǵyn úımen qamtamasyz etý zańdylyǵyna taldaý júrgizip, birqatar kemshilikti anyqtaǵan bolatyn.