Qyzylordada dala órtine ǵaryshtan baqylaý ornatylǵan

QYZYLORDA. KAZINFORM – Bıyl Qyzylorda oblysynyń orman qorynda 8 órt oqıǵasy tirkeldi.

Qyzylorda oblystyq tótenshe jaǵdaılar departamentiniń málimetine súıensek, ótken jyly da dál osynsha derek esepke alynǵan. Órt oqıǵalary Jańaqorǵan, Shıeli, Syrdarııa jáne Qazaly aýdandarynda tirkelgen.

Tilsiz jaýdy baqylaýǵa «Qazaqstan ǵarysh sapary» mekemesi tartylǵan.

- Mekemeniń saıty arqyly departament kezekshisi kúndelikti kosmomonıtorıng júrgizedi. Kosmomonıtorıng kezinde anyqtalǵan belgiler boıynsha koordınattary naqtylanyp, qaýip tóngen eldi mekenniń jergilikti atqarýshy organdarynan aqparat alynady, - delingen departament habarlamasynda.

Qyzylorda oblysyndaǵy 7 mln 300 myń gektar jer orman qorynda. Onyń 3 mln 800 myń gektary — toǵaıly alqaptar. 26 naýryzda dalalyq aýmaq órtin baqylaý kúsheıtildi.

Mamandar klımattyń qurǵaq bolýyna baılanysty dala órtteriniń paıda bolý jáne tez taraý qaýpi asa joǵary ekenin aıtyp otyr.

Aıta keteıik, jyl basynan beri Qyzylorda oblysynda 100-ge tarta órt oqıǵasy bolǵan. Tilsiz jaýdan 2 adam kóz jumdy.