Qyzylordada burynǵy polıtseı bekire ósirip júr
QYZYLORDA. KAZINFORM – Qyzylorda oblysynda ótken ǵasyrdyń 60-jyldary joıylyp ketken bekire qaıtadan ósirile bastady.
Sharýashylyq Qyzylorda qalasynyń Talsýat aýylynda ornalasqan. Ony «Han Bekire 11» aýyl sharýashylyǵy óndiristik kooperatıviniń ıesi Ǵalymjan Naǵıev basqaryp otyr. Ózi quqyq qorǵaý organynda talaı jyl eńbek etip, podpolkovnık shenimen otstavkige shyqqan. Balyq sharýashylyǵymen jeti jyl buryn aınalysa bastaǵan. Alǵashqyda Syr óńirine tán sazan, dóńmańdaı, amýr balyqtaryn ósiripti. Bekire sharýashylyǵyna den qoıǵaly nebári eki jyl.
- Bizdiń óńirde bekire 1964 jyly resmı túrde joıylǵan eken. Sony zertteı kele buryn Aral teńizinde, Qambash kólinde bolǵan balyq túrin nege qaıtadan ósirmeske degen oı keldi. Aldymen ony Syrdarııanyń sýynda ósirýge bola ma, joq pa, onyń quramyndaǵy hımııalyq qospalarǵa shydaı ma, joq pa, sony baıqap kórý kerek boldy. Ázirge nátıje jaman emes, - dedi kásipker.
Onyń aıtýynsha, jasandy jolmen balyq ósirýdiń artyqshylyǵy jeterlik. Tabıǵı jolmen 1 mln ýyldyryqtyń 1%-y ǵana ósip shyǵady eken. Qalǵany óledi, jem bolady. Al arnaıy apparattyń kómegimen 50%-dan 80, keıde 90%-ǵa deıingi aralyqta shyǵarýǵa bolady. Sharýashylyq nysanynda osy kúni 5 myńdaı shabaq bar. Tabıǵı gaz, sý, elektr jaryǵy jetkenimen basseın tarlyq etip tur. Budan balyqtyń ósý qarqyny tómendeıdi. Kooperatıv ıesi «Amanat» partııasynyń «Aýyl amanaty» jobasyna qatysý úshin qujat ótkizgen. Memleketten jeńildetilgen shartpen nesıe alsa, joǵyn túgendegisi keledi.
Keıipkerimiz basseındegi balyqtar aldaǵy jyldary-aq salmaq jınap, halyq tutynatyn ónimge aınalatynyna senimdi. Aıtýynsha, bekireniń jáne ýyldyryǵynyń qymbat bolýy tegin emes. Naryqta balyqtyń kelisi 10 myń teńgeden satylyp jatyr.
– Bekireniń denesi qurt, mıkrob qabyldamaıdy. Kerisinshe adam aǵzasyna paıdaly dárýmenge baı. Sondyqtan eń taza balyq bolyp esepteledi. Munda basqa balyqtardaǵy sııaqty tiken bolmaıdy, tek shemirshek bar. Súbe et esebinde júredi. Bekire – balyqtardyń ishindegi álsizi. Salmaǵy 5 gramnan asqasyn ǵana ımmýnıteti joǵarylaı bastaıdy Aýyrǵan jaǵdaıda qarap, tekserip, emdeımiz. Basseınde ósirgenniń tıimdiligi, nemen qorektenetini, densaýlyq jaǵdaıy kóz aldymyzda, - dedi Ǵalymjan Naǵıev.
Balyq aýlaý jáne ony qorǵaý, balyq qoryn molaıtý jumysy jóninde buǵan deıin Kazinform tilshisine ıhtıolog, balyq ósirý salasynyń sarapshysy Meırambek Pazylbekov suhbat bergen edi.